वीरगन्ज–गत स्थानीय तहको निर्वाचनमा वीरगन्ज महानगरपालिकाको उपप्रमुखमा पराजित वीणा जयसवाल प्रतिनिधिसभा सदस्यमा समानुपातिकबाट चयन भएकी छिन् ।
राप्रपाले निर्वाचन आयोगमा बुझाएको समानुपातिकतर्फका ७ जना सांसदको नाममा जयसवालको नाम पनि रहेको छ । वीरगन्ज महानगरपालिका –२४ की जयसवाल गत बैशाखमा भएको स्थानीय तह निर्वाचनमा राप्रपाकै तर्फबाट वीरगन्ज महानगरको उपप्रमुखमा उम्मेदवार बनेकी थिइन् । निर्वाचनमा जयसवाल ५ हजार ९८८ मत ल्याउँदै तेश्रो स्थानमा सिमित भएकी थिइन् ।
राप्रपाले प्रतिनिधिसभातर्फ जयसवालसँगै पशुपतिशमशेर जबरा, बुद्धिमान तामाङ, रोशन कार्की, गीता बस्नेत, बीना लामा र अनिषा नेपालीको नाम आयोगमा पठाएको छ ।
केन्द्रीय कार्यासम्पादन समितिको बैठकमा समानुपातिकका केही नाममा विवाद भएपछि सबै टुङगो लगाएर सूची पठाउने जिम्मेवारी अध्यक्ष राजेन्द्र लिङदेनलाई दिइएको थियो ।
राप्रपाले प्रतिनिधिसभातर्फ ७, प्रदेश –१ मा ४, मधेशमा १, बागमतीमा ६, गण्डकीमा २, लुम्बिनीमा २, कर्णालीमा १ र सुदूरपश्चिम प्रदेशमा १ जना समानुपातिक सांसद् छानेको छ ।
