• Jan 17 2021 | २०७७, माघ ४गते

२०७७, माघ ४गते

गौतम बुद्धबारे भारतीय विदेशमन्त्रीको अभिव्यक्ति 'तत्काल सच्याइनु'को अर्थ

क्यानाडानेपाल श्रावण २६ २०७७
  • 1.1K
    SHARES
  • गौतम बुद्धबारे भारतीय विदेशमन्त्रीको अभिव्यक्ति 'तत्काल सच्याइनु'को अर्थ

    बीबीसी।  भारतीय विदेशमन्त्रीले शनिवार एउटा भर्चुअल सम्मेलनका क्रममा "दुई महान् भारतीय" भन्दै गौतम बुद्ध र महात्मा गान्धीको नाम लिए। बुद्धलाई पनि भारतीय भनेकोमा विदेशमन्त्री एस जयशङ्करको अभिव्यक्तिको नेपालमा चर्को आलोचना भयो। नेपालको परराष्ट्र मन्त्रालयले गौतम बुद्धको जन्मस्थल नेपालमै रहेको भन्ने तथ्य निर्विवादित रहेको बतायो। आइतवार भारतीय विदेश मन्त्रालयले आफ्ना विदेशमन्त्रीको टिप्पणी साझा बौद्ध विरासतसँग जोडिएर गरिएको र बुद्धको जन्मस्थल नेपालमा भएको कुरामा विवाद नरहेको जनायो।

    उसले भन्यो, "विदेशमन्त्रीले साझा बौद्ध विरासतबारे चर्चा गर्दै हुनुहुन्थ्यो।" "यसमा कुनै सन्देह छैन कि गौतम बुद्धको जन्म लुम्बिनीमा भएको थियो जुन नेपालमा छ।" करिब एक महिनाअघि प्रधानमन्त्री केपी शर्मा ओलीले रामायणमा वर्णित अयोध्या नेपालमै रहेको दाबी गर्दै राम भारतका नभई नेपालकै राजकुमार भएको अभिव्यक्ति दिएपछि दुई देशमा त्यसको धेरैले चर्को आलोचना गरे।

    सत्तारूढ भाजपाका प्रवक्ता विजय शोनकार शास्त्रीले "भगवान्‌ राम आस्थाका विषय हुन् र मानिसहरूले त्योसँग खेल्न कसैलाई दिने छैनन्, चाहे ती नेपालका प्रधानमन्त्री होऊन् वा अन्य कोही" भनेर कडा प्रतिक्रिया दिए। राम र अयोध्याबारे नेपाली प्रधानमन्त्रीको अभिव्यक्तिले निम्त्याएको तनाव मत्थर हुँदै गइरहेका बेला गौतम बुद्धबारे भारतीय विदेशमन्त्रीको विवादास्पद अभिव्यक्तिलाई द्विपक्षीय सम्बन्धका निम्ति धेरैले शुभ सङ्केत मानेनन्।

    सन् २०१४ मा नेपाल भ्रमणका क्रममा तत्कालीन संविधानसभालाई सम्बोधन गर्ने क्रममा भारतीय प्रधानमन्त्री नरेन्द्र मोदी आफैँले पनि गौतम बुद्ध नेपालमा जन्मिएको उल्लेख गरेका थिए। आफ्नै प्रधानमन्त्रीले त्यो तथ्यलाई स्वीकारिसकेको पृष्ठभूमिमा विदेशमन्त्री जयशङ्करले गौतम बुद्धलाई भारतीय नागरिक भन्नुको कारण के हुनसक्छ त?

    त्रिभुवन विश्वविद्यालयको अन्तर्राष्ट्रिय सम्बन्ध र कूटनीतिक विभागका प्रमुख खड्ग केसीले सोमवार बीबीसी न्यूज नेपालीसित भने, "प्रधानमन्त्री ओलीको अभिव्यक्तिलाई 'काउन्टर स्टन्ट' गर्न खोजेको भन्ने एउटा अर्थ सहजै लगाउन सकिन्छ।" परराष्ट्रविद्‌ श्रीधर खत्री पनि भारतीय विदेशमन्त्री जयशङ्करको अभिव्यक्ति "जबाफ स्वरूप" आएको हुनसक्ने ठम्याउँछन्।

    तर आफ्ना विदेशमन्त्रीको विवादास्पद अभिव्यक्तिलाई भारतीय विदेश मन्त्रालयले तत्काल सच्याउनुलाई कतिपय परराष्ट्रविद्‌ले सकारात्मक रूपमा लिएका छन्। "भारतीय विदेश मन्त्रालयका प्रवक्ताले तत्काल सच्याएर प्रतिक्रिया दिनु भनेको त्यसबाट द्विपक्षीय सम्बन्धमा थप आघात नपुगोस् भन्ने धारणाबाट अभिप्रेरित भएको देखिन्छ," पूर्वपरराष्ट्रमन्त्री भेषबहादुर थापाले भने।

    थापा भारतका लागि नेपालका पूर्वराजदूत र नेपाल-भारत सम्बन्धबारे सुझाव दिन गठित प्रबुद्ध व्यक्तिहरूको समूह ईपीजीका सदस्य पनि हुन्। केसी भने गौतम बुद्धसम्बन्धी भारतीय विदेशमन्त्रीको अभिव्यक्ति तत्काल सच्याउनुको पछाडि अर्को कारण पनि देख्छन्। "विगतमा संयुक्त राष्ट्रसङ्घले जापानी वास्तुकलाविद्‌ केन्जो टाङ्गेमार्फत् बृहत्तर लुम्बिनी गुरुयोजना नै बनाउन लगाएको थियो।"

    "अन्तर्राष्ट्रिय एजेन्डा बनिसकेको विषयमा 'काउन्टर आर्ग्युमेन्ट' गरेर हामीलाई फाइदा हुन सक्दैन भनेर पनि भारतले आफ्ना विदेशमन्त्रीको अभिव्यक्तिलाई सच्याएको हुनुपर्छ," केसीले थपे। गत साता भारतको अयोध्यामा राम मन्दिर निर्माणका लागि भूमिपूजन एवम् शिलान्यास गरेका मोदीले नेपाल र सीताबारे चर्चा गर्नु सम्बन्ध सुधारका लागि सकारात्मक सङ्केत भएको परराष्ट्र मामिलाका कतिपय जानकार बताउँछन्। नेपालसँग रामको सम्बन्ध विशेष भएको उल्लेख गर्दै मोदीले भनेका थिए, "नेपालसँग त भगवान्‌ श्रीरामको सम्बन्ध माता जानकीसँग जोडिएको छ।"

    सांस्कृतिक रूपमा एकदमै निकट मानिने नेपाल र भारतको सम्बन्ध नागरिक स्तरको पनि भएकोले सामान्य द्विपक्षीयभन्दा पृथक मानिन्छ। परराष्ट्रविद्‌ खत्री परराष्ट्र मामिलामा धर्मजस्तो संवेदनशील विषयमा टीकाटिप्पणी गर्न नहुने सुझाउँछन्। "सानो देश होस् अथवा ठूलो, धर्मको विषयलाई लिएर खेलाँची गरेको परराष्ट्र नीतिमा राम्रो मानिँदैन किनभने त्यसले पछिसम्म द्विपक्षीय सम्बन्धमा असर पार्छ।"

    कतिपय परराष्ट्रविद्‌हरू नेपाली र भारतीय दुवै राजनीतिक तहबाट अप्रासङ्गिक विषय उठाइएको तर्क गर्छन्। त्यस्तै धारणा राख्ने परराष्ट्रविद्‌ निश्चलनाथ पाण्डेले बीबीसी न्यूज नेपालीसित भने, "अप्रासङ्गिक कुराहरू उठाइएको छ। दुवै सरकारहरू शाब्दिक युद्धमा होमिएको देखिन्छ।"

    समाचार : बीबीसी नेपाली सेवा 


    श्रावण २६, २०७७ सोमवार २१:५९:१९ बजे : प्रकाशित

  • सम्बन्धित विषय:

  • # गौतम बुद्ध

  • क्यानाडानेपाल डेस्क

    अर्कोसमाचार

    नेपाल-भारत सीमा विवादबारे अर्थपूर्ण वार्ता हुन नसक्नुको कारण के हो ?

    क्यानाडानेपाल

    माघ ३

  • 176
    SHARES
  • नेपाल-भारत सीमा विवादबारे अर्थपूर्ण वार्ता हुन नसक्नुको कारण के हो ?

    सीमा विवादबारे कुनै ठोस कुरा नगरी नेपाल-भारत परराष्ट्रमन्त्रीस्तरीय संयुक्त आयोगको बैठक सकिएपछि त्यसबारे अनेक तर्कवितर्क भइरहेको छ।

    दिल्ली बैठकमा नेपालले त्यो विषय उठाए पनि भारतीय पक्षले 'गम्भीरता नदेखाउँदा' त्यसबारे सामान्य छलफल मात्रै भएको र अर्थपूर्ण वार्ता हुन नसकेको विवरण आएको छ।

     

    सीमा विवादसम्बन्धी संवादका विषयमा पत्रकारहरूको जिज्ञासामा भारतीय विदेश मन्त्रालयका प्रवक्ता अनुराग श्रीवास्तवले भनेका छन्, "सीमाका विषयमा हाम्रो अडान जगजाहेर छ। र, म के कुरा स्पष्ट पार्न चाहन्छु भने संयुक्त आयोग एवं सीमा बैठक फरकफरक संयन्त्र हुन्।"

    परराष्ट्रमन्त्री प्रदीपकुमार ज्ञवाली र उनका भारतीय समकक्षी एस जयशङ्करबीच शुक्रवार वार्ता भएको थियो।

    मन्त्री ज्ञवाली दिल्ली जानुअघि परराष्ट्र मन्त्रालयले बैठकमा व्यापार, पारवहन, ऊर्जा, सीमा, कोभिड-१९ सम्बन्धी सहकार्य, पूर्वाधार र सम्पर्क सञ्जाल, लगानी, कृषि, पर्यटन, संस्कृति आदि विषय पर्ने जनाएको थियो।

    त्यस्तै प्रधानमन्त्री केपी शर्मा ओलीले परराष्ट्रमन्त्री ज्ञवालीको भ्रमणका क्रममा "लिपुलेक, कालापानी र लिम्पियाधुरा क्षेत्र फिर्ता गराउने विषयमा कुराकानी हुने" सार्वजनिक अभिव्यक्ति दिएका थिए।

    यसै सन्दर्भमा बीबीसी न्यूज नेपालीका गनी अन्सारीले सीमाविद्‌ बुद्धिनारायण श्रेष्ठसँग सङ्क्षिप्त कुराकानी गरेका छन्। प्रस्तुत छ श्रेष्ठसँग गरिएको कुराकानीको सम्पादित अंशः

    नेपालसँग सीमा विवादको विषयमा कुरा गर्न भारत सधैँ आलटाल गर्ने गरेको धेरैले आरोप लगाउने गरेका छन्। यसमा तपाईँको के मत छ?

    मैले बुझे अनुसार भारतसँग पर्याप्त पुराना दस्ताबेज र नक्साहरू छैनन्। उसको पक्षमा पुराना नक्सा छैनन् र उसले पछि बनाएका नक्सा 'डिस्टोर्ट' गरी बनाइएका छन्।

    त्यसले गर्दा भारत नेपालसँग सीमा विवादबारे पछि वार्ता गर्ने भन्दै पछाडि हट्ने गरेको छ।उदाहरणका लागि भारतले सन् २०१९ मा नयाँ राजनीतिक नक्सा जारी गरेपछि त्यसको नेपालले विरोध गर्दै 'डिप्लोम्याटिक नोट' समेत पठायो।

    तर कोरोनाभाइरस महामारीको कारण देखाउँदै उसले पछि कुरा गर्ने भन्यो। यसबाट के विश्लेषण गर्न सकिन्छ भने आफूसँग कमजोर प्रमाण भएका कारण भारत वार्ता अगाडि बढाउन चाहँदैन।

    अर्को कारण उसले आफ्नो पक्षमा प्रमाणहरू बटुलिरहेको पनि हुनसक्छ।

    भारत सधैँ पन्छिरह्यो भने उससँग सीमा विवादलाई नेपालले कसरी टुङ्ग्याउन सक्ला?

    सबैभन्दा ठूलो समाधान भनेको वार्ता नै हो। अहिलेको जमानामा वार्ता गर्ने हो। लडाइँ गरेर अथवा क्षेप्यास्त्र हानेर कसैसँग सीमा विवाद समाधान हुँदैन।

    नेपालले बुद्धिमत्तापूर्ण तरिकाले भारतसँग वार्ता गर्ने वातावरण बनाउन सक्नुपर्छ। यसमा म उदाहरण दिन चाहन्छु।

    उत्तरी नेपालका १८ वटा ठाउँमा १७ वर्षसम्म भारतीय सेनाको चेक पोस्ट थिए। मातृकाप्रसाद कोइरालाको पालामा खडा गरिएका ती पोस्टहरू १७ वर्षपछि कीर्तिनिधि बिष्टको पालामा हटाइयो।

    ती चेक पोस्टका सैनिकहरूलाई फूलमाला लगाएर नेपालले बिदाइ गर्‍यो। उनीहरू पनि हाँस्दै नेपाल छाडे। त्यो किन भयो भने नेपालले बुद्धिमत्तापूर्वक वार्ता गर्‍यो।

    यदुनाथ खनालले बुद्धिमत्तापूर्ण कूटनीति र त्यस बेलाका भारतका लागि नेपाली राजदूत भीमबहादुर पाँडेले सशक्त भूमिका देखाउनुभयो।

    क्षेत्रविक्रम राणा, पदमबहादुर कँडेल र हृषीकेश शाहले भूमिका निर्वाह गरे। कीर्तिनिधि बिष्ट र राजा महेन्द्रले भूमिका निर्वाह गरे। त्यो 'इन्टिग्रेटेड अप्रोच' भएर बुद्धिमत्ता र तर्कपूर्ण कूटनीतिका कारण त्यो बेला भारतले आफ्ना सेनालाई सर्लक्क उठाएर लग्यो।

    अहिले त्यसरी गर्दा पनि भारतले मानेन भने के गर्ने नि?

    त्यो त क्यान्सरको औषधि छैन भने जस्तै हो। तर मलाई के लाग्छ भने विश्वको एउटा ठूलो प्रजातान्त्रिक मुलुक भारतको आफ्नै छवि छ। त्यो छवि धमिल्याउन भारत पनि चाहँदैन नि त।

    नेपालले अन्तर्राष्ट्रिय स्तरमा पनि बुद्धिमत्तापूर्ण ढङ्गले वातावरण निर्माण गरेर समस्याको समाधान खोज्नुपर्छ।

    एउटा कुरा मैले सम्झेँ हालसालै मस्कोमा एउटा सम्मेलन सकिएपछि भारत र पाकिस्तानका विदेशमन्त्रीबीच साइडलाइनमा कुरा भएको थियो।

    त्यो कुरा गराउनका लागि रुसको परराष्ट्रमन्त्रीले पहल गरेका थिए। नेपालले पनि त्यसैगरी अन्तर्राष्ट्रिय वातावरण सिर्जना गर्न सक्यो भने भारतले हाँसीहाँसी कुरा गर्ला। त्यसैले हाम्रै भूमिका महत्त्वपूर्ण हुनुपर्छ, हामी नै जागरुक हुनुपर्छ।

    उसोभए यो विषयमा नेपालकै भूमिका सशक्त हुन नसकेको तपाईँले भन्न खोज्नुभएको हो?

    एकदम। उदाहरणका साथ तपाईँलाई भन्न चाहन्छु नेपालबाट एजेन्डा जाँदा सीमासम्बन्धी पनि कुरा हुन्छ भनेर गयो र भारतले त्यसलाई स्वीकृत गर्‍यो भन्ने हिसाबले कुरा आयो।

    तर भारतले पछि अस्वीकृत गर्दा हाम्रा परराष्ट्रमन्त्रीले कुरा गरौँ, कुराको थालनी गर्दैमा के बिग्रिन्छ र भन्न सक्नुपर्थ्यो। कुरा सुरु गर्दैमा कोही जित्ने वा हार्ने हुँदैन भनेर भन्न सक्नुपर्थ्यो।

    तर हाम्रो परराष्ट्रमन्त्रीले त्यसो भन्न सक्नुभएन। भारतस्थित हाम्रा राजदूत नीलाम्बर आचार्यले पनि सशक्त भूमिका निर्वाह गर्न सक्नुभएन। मेरो विचारमा हाम्रो तर्फबाट हुने यी र यस्तै कमजोरी हुन्।यो समाचार बीबीसी नेपालीबाट साभार गरिएको हो । 

     


    माघ ३, २०७७ शनिवार १९:०१:०६ बजे : प्रकाशित

  • सम्बन्धित विषय:

  • # नेपाल-भारत सीमा विवाद

  • क्यानाडानेपाल डेस्क

    नेपालमा थप २ सय ४० जनामा कोरोना संक्रमण, ४ सय ७७ जना निको, सक्रिय संक्रमित कति ?

    क्यानाडानेपाल

    माघ ३

  • 212
    SHARES
  • नेपालमा थप २ सय ४० जनामा कोरोना संक्रमण, ४ सय ७७ जना निको, सक्रिय संक्रमित कति ?

    काठमाडौँ। सरकारले पछिल्लो २४ घण्टामा मुलुकभर थप २ सय ४० जनामा कोरोनाभाइरस संक्रमण पुष्टि भएको जानकारी दिएको छ ।

    शनिबार स्वास्थ्य तथा जनसंख्या मन्त्रालयकाअनुसार ३ हजार ८ सय ४४ वटा पीसीआर परिक्षण गर्दा २ सय ४० जनामा कोरोना संक्रमण देखिएको हो । यससँगै कूल संक्रमितको संख्या  २ लाख ६७ हजार ५६ पुगेको छ।

    साथै पछिल्लो २४ घण्टामा ४ सय ७७ जना कोरोनाभाइरस संक्रमणमुक्त भएसँगै निको हुनेको कूल संख्या २ लाख ६१ हजार ४४ पुगेको मन्त्रालयले जानकारी दिएको छ । अब नेपालमा सक्रिय संक्रमितको संख्या ४ हजार ५८ रहेको छ ।

    यसैगरी पछिल्लो २४ घण्टामा ६ जना कोरोनाभाइरस संक्रमितले ज्यान गुमाएका छन् । योसँगै कोरोनाभाइरस संक्रमणबाट ज्यान गुमाउनेको संख्या १९ सय ५४ जना पुगेको स्वास्थ्य मन्त्रालयले जनाएको छ । 


    माघ ३, २०७७ शनिवार १६:३७:४० बजे : प्रकाशित

  • सम्बन्धित विषय:

  • # कोरोना भाइरस

  • क्यानाडानेपाल डेस्क

    विवाह बन्धनमा बाधिँदै मुख्यमन्त्री शेरधन राई, यी हुन् बेहुली

    क्यानाडानेपाल

    माघ ३

  • 376
    SHARES
  • विवाह बन्धनमा बाधिँदै मुख्यमन्त्री शेरधन राई, यी हुन् बेहुली

    काठमाडौं - प्रदेश १ का मुख्यमन्त्री शेरधन राई विवाह बन्धनमा बाधिँने भएका छन् । उनले सन् २०१८ की ‘मिस मंगोल नेपाल’ ज्याङ्मु शेर्पासँग बिबाह गर्न लागेका हुन् ।

    विवाह माघ ११ गते हुने बताइएको छ । मुख्यमन्त्री राई र  जाङ्मु लामो समय देखी प्रेममा रहेको बताइएको छ ।  

    sherdhan.jpg

    संखुवासभाकी जाङ्मु हाल काठमाडौंमा बस्दै आएकी छन्। मोडेलिङ क्षेत्रमा सक्रिय रहदै आएकी उनले विभिन्न म्यूजिक भिडिओमा पनि काम गरेकी छिन् । 

    उनीहरुको विवाह काठमाडौंमा नेकपाका सीमित नेताहरू, निकट मित्र र पारिवारिक सदस्यबीच हुने बताइएको छ । 


    माघ ३, २०७७ शनिवार १६:०३:३७ बजे : प्रकाशित

  • सम्बन्धित विषय:

  • # शेरधन राई
  • # विवाह

  • क्यानाडानेपाल डेस्क

    कोरोना संक्रमित भएका कर्मचारीको जागिर गुम्यो

    क्यानाडानेपाल

    माघ ३

  • 260
    SHARES
  • कोरोना संक्रमित भएका कर्मचारीको जागिर गुम्यो

    म्याग्दी - कोरोना भाइरसबाट सङ्क्रमित भएर होम आइसोलेशनमा बसेका म्याग्दीको अन्नपूर्ण गाउँपालिकाको केन्द्र पोखरेबगरस्थित प्रभु बैंकको शाखामा कार्यरत एक कर्मचारीको जागिर गुमेको छ । एक्सलेन्ट सेक्युरिटी प्रालिमार्फत प्रभु बैंकको सो शाखामा सुरक्षा गार्डका रूपमा काम गर्दै आएका अन्नपूर्ण–६ का ४१ वर्षीय शिव बरुवालको जागिर खोसिएको हो । 

    ज्वरो र रुघाखोकी देखिएपछि गाउँपालिकाको स्वास्थ्य शाखामार्फत गत पुस १ गते पिसीआर परीक्षण गर्न उहाँले स्वाब दिनुभएको थियो । “पुस ५ गते कोरोना सङ्क्रमण पुष्टि भएपछि बैंक र सेक्युरिटी कम्पनीलाई जानकारी गराएर १४ दिन आइसोलेशन बसेको थिए”, उहाँले भन्नुभयो, “कोरोना जितेर बैंकमा आउँदा अर्कैलाई राखिसकेका रहेछन् ।” 

    रोग निको भए पनि जागिरलाई निरन्तरता दिन र कोरोना बीमाको रकम दाबी प्रक्रियामा कम्पनीले बेवास्ता गरेको बरुवालले गुनासो गर्नुभयो । “टोल, छिमेकमा कोरोना सङ्क्रमित भनेर दुव्र्यवहार सहनुप¥यो”, उहाँले भन्नुभयो, “आइसोलेशन बस्नु पर्दा जागिर गुमेकामा झनै पीडा थपिएको छ ।”  

    बैंकमा काम गर्ने क्रममा नै कोरोना सरेको हुनसक्ने बरुवालको अनुमान छ । रोजगारीको खोजीमा उहाँले चार वर्ष मलेसियामा काम गर्नुभएको थियो । बरुवालको परिवारमा बाबुआमा, श्रीमतीसहित तीन छोरी र दुई छोरा छन् । कम्पनीले मासिक रु १८ हजार तलब दिने गरेको थियो । जागिर गुमेपछि बरुवाललाई घरव्यवहार चलाउन समस्या भएको छ । 

    प्रभु बैंकको अन्नपूर्ण शाखाका प्रमुख विनोद केसीले सुरक्षागार्डको नियुक्ति, तलब, भत्तालगायत सबै जिम्मेवारी सम्बन्धित कम्पनीको भएको बताउनुभयो । काठमाडौमा रहेको एक्सलेन्ट सेक्युरिटीका कृष्ण गुरुङले बरुवाललाई जागिरबाट ननिकालेको जिकिर गर्नुभयो । रासस


    माघ ३, २०७७ शनिवार ११:४४:२५ बजे : प्रकाशित

  • सम्बन्धित विषय:

  • # कोरोना भाइरस

  • क्यानाडानेपाल डेस्क

    सुरक्षा गस्तीमा गएका प्रहरी हवल्दारको लडेर ज्यान गयो

    क्यानाडानेपाल

    माघ ३

  • 214
    SHARES
  • सुरक्षा गस्तीमा गएका प्रहरी हवल्दारको लडेर ज्यान गयो

    सिमकोट - हुम्लामा सुरक्षा गस्तीमा गएका प्रहरी हवल्दारको मृत्यु भएको छ । 

    मृत्यु हुनेमा चङ्खेली गाउँपालिकास्थित मेल्छाम प्रहरी चौकीमा कार्यरत हवल्दार देवेन्द्र खड्का रहेका छन् । उनको माथिबाट खसेको ढुङ्गा छल्न खोज्दा लडेर मृत्यु भएको हो । 

    गत पुस २८ गते सुरक्षा गस्तीमा गएको बेला माथिबाट आएको ढुङ्गा छल्न खोज्दा लडेर उनी गम्भीर घाइते भएका थिए । उनको काठमाडौँस्थित नेपाल प्रहरी अस्पताल महाराजगञ्जमा उपचारको क्रममा शुक्रबार मृत्यु भएको हो । 
     


    माघ ३, २०७७ शनिवार १०:१७:०० बजे : प्रकाशित

  • सम्बन्धित विषय:

  • # प्रहरी हवल्दार

  • क्यानाडानेपाल डेस्क

    आज काठमाडौं उपत्यकाका यी स्थानमा बत्ति जाने

    क्यानाडानेपाल

    माघ ३

  • 642
    SHARES
  • आज काठमाडौं उपत्यकाका यी स्थानमा बत्ति जाने

    काठमाडौं । शनिबार काठमाडौंका विभिन्न स्थानमा बत्ति जाने भएको छ ।

    नेपाल विद्युत् प्राधिकरणका अनुसार मर्मतको काम गर्नुपर्ने भएकोले  बुढानिलकण्ठ सबस्टेशन, महाराजगञ्ज तथा पुल्चोक वितरण केन्द्रबाट २१ स्थानमा बत्ति जाने भएको हो । 

    प्राधिकरणले हात्तीगौडा, धापासी हाइट, मनकामना टोल, ग्रीनल्याण्ड चोक, बसुन्धारा, गोंगबुलगायतका स्थानमा विद्युत् कटौती गरिने जनाइएको छ । मर्मतको काम सकिएपछि बिजुली दिइने जनाइएको छ । 
     


    माघ ३, २०७७ शनिवार ०७:५७:०२ बजे : प्रकाशित

  • सम्बन्धित विषय:

  • # बत्ति जाने

  • क्यानाडानेपाल डेस्क