• Oct 30 2020 | २०७७, कार्तिक १४गते

२०७७, कार्तिक १४गते

यो साता चर्चामा:

 कोरोना लामो समयसम्म निको भएन भने के हुन्छ ?  

क्यानाडानेपाल डेस्क कार्तिक १ २०७७
  • 3.3K
    SHARES
  •  कोरोना लामो समयसम्म निको भएन भने के हुन्छ ?  

    'दीर्घ कोभिड' अर्थात् कोरोनाभाइरस सङ्क्रमणको दीर्घ प्रभावका कारण मानिसहरूलाई चार भिन्न समस्या पारिरहेको हुनसक्ने एउटा अध्ययनले देखाएको छ।

    अनि यसले किन निरन्तर लक्षण बेहोरिरहेका यी मानिसलाई अविश्वास गरिन्छ र उपचार गरिँदैन भन्ने पनि बुझाउन सक्छ।

    दीर्घ कोभिड बेहोरिरहेका मानिसहरूमा गम्भीर मनोवैज्ञानिक प्रभाव परिरहेको हुनसक्ने न्याश्नल इन्स्टिट्यूट अफ हेल्थ रिसर्चको विवरणमा उल्लेख छ।

    उनीहरूलाई थप सहयोगको खाँचो छ - अनि उपचार गर्ने स्वास्थ्यकर्मीहरूमा पनि थप जानकारी हुन जरुरी छ।

    जीवन बदल्ने अनुभव
    अधिकांश मानिसहरूलाई सामान्य कोरोनाभाइरस सङ्क्रमण भएको दुई सातामा ठिक हुने र अलि गम्भीर सङ्क्रमण भएमा तीन सातामा ठिक हुने बताइन्छ।

    तर यो रिपोर्टका अनुसार हजारौँ मानिसहरू "निरन्तरको कोभिड" बाट ग्रस्त भएका छन्।

    अनि यूकेमा कोरोनाभाइरसका मामिला वृद्धि हुँदै जाँदा दीर्घ कोभिड बेहोर्नेको सङ्ख्या पनि आगामी महिनाहरूमा बढ्ने देखिन्छ।

    फेसबुकमा दीर्घ कोभिडले ग्रस्त भएकाहरूको सहायता समूहमा आबद्ध १४ जनाको अन्तर्वार्तामा आधारित भएर प्रकाशित पछिल्लो अध्ययनका अनुसार निरन्तरको लक्षणहरूले श्वासप्रश्वासमा कठिनाइदेखि लिएर मस्तिष्क, मुटु तथा कार्डियोभास्कुलर प्रणाली, मिर्गौला, आन्द्रा, कलेजो र छालासम्म प्रभाव पारिरहेका छन्।

    यी लक्षणहरू निम्न चार भिन्न समस्याका कारण भएका हुनसक्छन्:

    - फोक्सो र मुटुमा भएका स्थायी क्षति

    - सघन उपचारपश्चात् उत्पन्न हुने समस्या

    - भाइरल सङ्क्रमणपश्चात् हुने थकाइको समस्या

    - निरन्तर कोभिड-१९ का लक्षणहरूका समस्या

    यसरी प्रभावित हुने कतिपयले गम्भीर कोभिड-१९ का कारण लामो समय अस्पतालमा बिताउनुपरेको थियो। तर कतिले भने सामान्य कोभिडमात्र बेहोरेका थिए अनि उनीहरूको परीक्षण वा रोग निदान समेत भएको थिएन।

    अध्ययनले भनेको छ "निरन्तर कोभिड-१९ को निदान" सम्बन्धी तरिका निर्माण गरेर मानिसहरूलाई सहायतामा पहुँच पुर्‍याउन सकिन्छ।

    "के प्रष्ट भइरहेको छ भने कतिपय मानिसका निम्ति कोभिड-१९ को सङ्क्रमण एउटा दीर्घकालीन रोग हो," रिपोर्टमा उल्लेख छ।

    "कतिपयका निम्ति यो अवस्था उनीहरूको अस्पताल बसाइसँग सम्बन्धित छ, तर अन्य कतिपयले भने प्रारम्भिक सङ्क्रमण साधारण भएको र घरमै निको भएको तर पछि विस्तारै लक्षण कडा हुँदै गएको बताइरहेका छन्।"

    रिपोर्टका लेखक डा. इलाइन म्याक्सवेल भन्छिन् उनलाई सुरुमा गम्भीर कोभिड भएकाहरूलाई मात्र यस्तो समस्या आइपर्छ होला भन्ने लागेको थियो। साथै कोभिडका कारण ज्यान गुमाउने जोखिम कम भएका समूहमा दीर्घ प्रभावको जोखिम पनि कम होला भन्ने उनले ठानेकी थिइन्। तर अध्ययनमा त्यस्तो मात्र पाइएन।

    "हामीलाई अब थाहा छ कि कतिपय मानिस जसलाई कोभिड सङ्क्रमण भएको पनि पत्तो भएको थिएन उनीहरूलाई यसको दीर्घ प्रभाव हप्तौँसम्म भेन्टिलेटरको सहारामा बाँचेकामा भन्दा पनि ज्यादा देखिएका घटना पनि छन्," उनले भनिन्।

    यूकेको ब्रिस्टल यूनिभर्सिटीकी लेक्चरर जो हाउस सङ्क्रमित भएको छ महिनापश्चात् पनि काममा फर्केकी छैनन्।

    सुरुमा नराम्रो खोकी र सास फेर्न अप्ठ्यारो भएको थियो जुन अहिले चरम थकान र टाउको दुखाइ अनि मुटुको समस्या र मांसपेशीको पीडासम्म पुगेको छ।

    "अघिल्लो दिन बिउँझने बित्तिकै रिँगटा लाग्यो र बेहोस भएँ। अस्पतालमा पुग्नु पर्‍यो," उनले भनिन्।

    मुटुको चाल तीव्र हुने र स्वाँस्वाँ हुने समस्यामा थोरै सुधार भएको छ तर अन्य लक्षणहरूका कारण उनको र उनको परिवारमा ठूलो प्रभाव परिरहेको छ।

    उनका पार्टनर एशले पनि निरन्तरका लक्षणको समस्या बेहोरिरहेका छन्। त्यसैले उनका किशोर छोराहरूले पकाउने र सरसफाइ गर्ने घरायसी कामको जिम्मा लिएका छन्।

    "अधिकांश मानिसहरूलाई साधारण लक्षण भनिन्छ। तर यथार्थमा ती साधारण होइनन्। हामीलाई सहयोगको खाँचो छ," उनले भनिन्।

    जो लाई सुरुमा न्यूमोनिया भएको थियो। खासमा उनलाई कोरोनाभाइरसको परीक्षण कहिल्यै पनि गरिएन र अस्पतालमा भर्ना पनि गरिएन।

    "हामी दुवै बिरामी भएपछि हामीले इच्छापत्र पनि बनायौँ। डरलाग्दो थियो।"

    अध्ययनको रिपोर्टले दीर्घ कोभिडका निम्ति निश्चित् अस्पतालका साथै समुदायमा सहयोगको आह्वान गरेको छ।

    साथै दीर्घ कोभिडले खासगरी अश्वेत वा एशियाली मूलका मानिस अनि पहिल्यैदेखि मानसिक वा सिकाइसम्बन्धी समस्या बेहोरिरहेका मानिसहरू थप प्रभावित हुनसक्ने उसले जनाएको छ।

    "हाम्रो उद्देश्य भनेको यो अध्ययनलाई स्वास्थ्यकर्मीहरूले उपयोग गरेर बिरामीहरूको अनुभव बुझ्न मद्दत पुगोस् भन्ने हो ताकि उनीहरूलाई आवश्यक पर्ने उपचार, सेवा र सहयोगमा पहुँच मिलोस्," डा. म्याक्सवेलले भनिन्।यो समाचार बीबीसी नेपालीबाट साभार गरिएको हो । 


    कार्तिक १, २०७७ शनिवार १७:५४:४३ बजे : प्रकाशित

  • सम्बन्धित विषय:

  • # कोरोना भाइरस

  • क्यानाडानेपाल डेस्क

    अर्कोसमाचार

    नेपालमा रेलमार्ग: विस्तार र विकासका अप्ठेरा के, सम्भावना कति ?

    क्यानाडानेपाल

    कार्तिक १४

  • 146
    SHARES
  • नेपालमा रेलमार्ग: विस्तार र विकासका अप्ठेरा के, सम्भावना कति ?

    काठमाडौँ।  नेपालमा पछिल्ला केही वर्षहरूमा रेलमार्ग विस्तार र रेल सञ्चालन सम्बन्धी विषयबारे चर्चा चुलिए पनि अपेक्षा अनुसार काम हुन नसकेको एक पूर्वाधारविद्ले बताएका छन्।

    रेलमार्गको औचित्य भए पनि विभिन्न विषयमा सरकार आँफै स्पष्ट हुन नसक्दा मुलुकको ठूलो स्रोत जोखिममा पर्न सक्ने पूर्वाधारविद् सूर्यराज आचार्यले बीबीसी नेपाली सेवालाई बताए। तर रेल विभागबाट हालसालै सेवा निवृत्त भएका पूर्व महानिर्देशक बलराम मिश्र नेपालका लागि रेल नयाँ प्रविधि भएकाले यसबारे क्रमिक रूपमा काम भइरहेको बताउँछन्।

    नेपालमा हाल पूर्व-पश्चिम रेलमार्गदेखि, भारत र चीनसँग जोडिने रेलमार्गसम्मका परियोजनाबारे चर्चा चुलिएको छ। त्यसबाहेक विभिन्न स्थानमा मेट्रो रेलदेखि मोनो रेल चलाउने भन्दै राजनीतिक दलहरूले चुनावी घोषणापत्रमै उल्लेख गरेपछि जनअपेक्षा पनि चुलिएको छ।

    समस्या के हो?

    तर लामो अन्तरालपछि केही समयअघि भारतबाट खरिद गरिएको रेल नेपालमा भित्रिए पनि आवश्यक कानुनी तथा भौतिक पूर्वाधारको कमीका कारण त्यसलाई पाल ओढाएर राख्नु परेको छ।

    आचार्यका अनुसार नेपालमा रेलमार्ग निर्माण र रेल सञ्चालनका विषयमा केही आधारभूत समस्या देखिन्छ। त्यसलाई सल्टाउनका लागि तत्काल राजनीतिक तहमा रेलको औचित्यदेखि गेज, गति अनि प्रविधि लगायतका विषयमा छलफल गरेर स्पष्ट खाका तयार पार्न जरुरी छ।

    "प्राविधिक तहमा हाम्रो रेल सञ्जालको योजनाबारेनै गम्भीर गृहकार्य भएको छैन। रेल, सडक र हवाई मार्गको एकीकृत गुरुयोजना तयार पार्न आवश्यक छ," उनले भने। रेलको विकास सहरको विकाससँग नजोडिएसम्म प्रभावकारी हुन नसक्ने मत राख्ने उनी जनशक्ति र संस्थागत विकासमा पनि ध्यान दिइनुपर्ने ठान्छन्।

    अपेक्षा बढी

    उनले भने, "हामीले यदि चीन र भारतले रेल बनाइदेलान् र चालकदेखि मर्मत सम्भार समेत उतैबाट आउने भन्ने आशा गर्‍यौँ भने त्यो हामीले धान्न सक्दैनौँ, यो प्रविधिमा हामी नजाऔँ।" तर रेल विभागबाट सेवानिवृत मिश्र नेपाल रेलमार्ग विकास अनि प्रविधिका विषयमा बामे सर्ने क्रममा रहेको हुँदा सबै कुरा अहिले नै भइहाल्नुपर्छ भन्ने किसिमले सोच्न नहुने बताउँछन्।

    रेलमार्गबारे राष्ट्रिय बहस गर्ने र एकीकृत गुरुयोजना तयार पार्ने विषयमा उनको विमति छैन। तर विभिन्न क्षेत्रमा क्रमिक रूपमा काम भइरहेको जनाउँदै उनी निकट भविष्यमा रेलको राम्रो पद्धति स्थापित गरेर विकासको बाटोमा लग्न सकिने गरेर काम भइरहेको बताउँछन्।

    उनी भन्छन्, "रेल विभागले अहिलेको आवश्यकता अनुसार गुरुयोजना बनाएको छ र त्यसै अनुसार अध्ययन भइरहेको छ। जनशक्ति तयार पार्नेदेखि विभिन्न विषयमा तयारी भइरहेको छ।"

    भारतबाट खरिद गरिएको रेल पालले छोपेको विषयलाई लिएर सरकारको तीव्र आलोचना भइरहेको छ। तर मिश्रले भने, "कोभिडका कारण थोरै तयारी गर्न सकिएन। कानुनी कारणले गर्दा रेल ल्याइहाल्नुपर्ने अवस्था थियो। छ महिनादेखि त्यो सीमा नजिकै राखिएको थियो।"

    तर आचार्य एक दशकअघि सम्झौता भएको रेल छ महिनाअघिबाट सुरु भएको महामारीका कारण रोकियो भन्नुको औचित्य माथि प्रश्न गर्छन्। नयाँ चीज भएकाले विज्ञहरूले रचनात्मक भूमिका निर्वाह गर्नुपर्ने अवस्था भए पनि झन् नकारात्मक प्रचार गरिएकोमा मिश्रको विमति छ।

    मिश्र र आचार्यबीचको बहस सुन्न तलको तस्बिरमा रहेको प्ले बटन थिच्नुहोस्।

    समाचार : बीबीसी नेपाली सेवा 


    कार्तिक १४, २०७७ शुक्रवार १५:१७:१२ बजे : प्रकाशित

    तेजेन्द्रजङ्ग थापा: 'दङ्गाकाबीच भारतबाट नेपाल ल्याएपछि राजा वीरेन्द्रले मलाइ चकलेट दिनुभयो' (भिडिओ)

    क्यानाडानेपाल

    कार्तिक १४

  • 138
    SHARES
  • तेजेन्द्रजङ्ग थापा: 'दङ्गाकाबीच भारतबाट नेपाल ल्याएपछि राजा वीरेन्द्रले मलाइ चकलेट दिनुभयो' (भिडिओ)

    तस्बिर: बीबीसी नेपाली सेवा 

    स्वर्गीय राजा वीरेन्द्रले चढ्ने एभ्रो जहाज हालसालै नेपाली सेनाले नारायणहिटी सङ्ग्रहालयलाई हस्तान्तरण गरेको छ। त्यसमा राजा वीरेन्द्रलाई कैयौँ पटक उडाउने पाइलट तेजेन्द्रजङ्ग थापा हुन्। थापा भन्छन्, “फ्लाइट सकेपछि मेरै नाम लिएर सिगार वा चकलेट बक्सिन्थ्यो।“ बेलायतमा पढेका पूर्व सहायक रथी थापा नेपाली सेनाका प्रथम पाइलट समेत हुन्।

    ४६ सिटको यो जहाज बेलायत सरकारले ४० वर्षअघि नेपाललाई उपहार दिएको थियो। त्यसमा राजा र उनका पाहुनाहरूलाई उडाइन्थ्यो। थापासँग कुराकानी गरेर बीबीसीले बनाएको यो भिडिओ हेर्नुहोस्।

     

    समाचार : बीबीसी नेपाली सेवा 


    कार्तिक १४, २०७७ शुक्रवार १४:१२:२१ बजे : प्रकाशित

    प्रहरी महानिरीक्षक शैलेश थापा क्षेत्रीबाट एफपियु युनामिड (डार्फर, सुडान) मिसन जाने प्रहरी टोलीलाई बिदाइ

    क्यानाडानेपाल

    कार्तिक १४

  • 174
    SHARES
  • प्रहरी महानिरीक्षक शैलेश थापा क्षेत्रीबाट एफपियु युनामिड (डार्फर, सुडान) मिसन जाने प्रहरी टोलीलाई बिदाइ

    काठमाडौं। संयुक्त राष्ट्रसंघको अनुरोधमा शान्ति स्थापनार्थ फर्मड पुलिस युनिट (एफपियु) को रुपमा डार्फर, सुडानस्थित युनामिड मिसन १७औं समूहमा खटि जाने प्रहरी कर्मचारीहरुलाई प्रहरी महानिरीक्षक शैलेश थापा क्षेत्रीले शुक्रबार प्रहरी प्रधान कार्यालयमा आयोजित एक समारोहबीच बिदाइ गरेका छन् ।

    बिदाइ समारोहमा प्रहरी महानिरीक्षक थापा क्षेत्रीले उक्त समूहका कन्टिनजेन्ट कमाण्डर प्रहरी उपरीक्षक सुरेन्द्र प्रसाद मैनालीलाई नेपालको राष्ट्रिय झण्डा हस्तान्तरण गरे।

    प्रहरी महानिरीक्षक थापा क्षेत्रीले मिसनमा छनौट भई प्रशिक्षण कार्यमा समेत सफल भएका समूहका सम्पूर्ण प्रहरी कर्मचारीहरुलाई हार्दिक वधाइ तथा शुभकामना दिए ।

    परिस्थितिमा आएको परिवर्तन र गतिशिलतालाई ध्यानमा राखी एफपियु छनौट मापदण्डलाई हालै अद्यावधिक गरिएको र अद्यावधिक मापदण्ड प्रहरी कर्मचारीको वृत्ति विकासको निम्ति थप लाभदायक हुने विश्वास उनले व्यक्त गरे ।

    संयुक्त राष्ट्रसंघीय मिसनमा खटिने प्रहरी कर्मचारी देश र संगठनको प्रतिनिधिको रुपमा रहने उल्लेख गर्दै प्रहरी महानिरीक्षक थापा क्षेत्रीले भने, ‘विदेशमा रहँदा तपाईं व्यक्ति र संगठन मात्र होइन, तपाईं एउटा मुलुक हो भन्ने कुरा तपाईंको आत्मामा रहनु पर्दछ ।’ 

    मिसनमा खटिने प्रहरी कर्मचारी राष्ट्रकै प्रतिनिधि भएकोले मर्यादित आचरण र अनुशासित हुनुपर्ने चर्चा गर्दै प्रहरी महानिरीक्षक थापा क्षेत्रीले युएनको मापदण्ड अनुसार व्यावसायिकता प्रदर्शन गरी दिएको जिम्मेवारी पूरा गर्न खटि जाने प्रहरी कर्मचारीहरुलाई निर्देशन दिए ।

    समारोहमा मिसन सम्बन्धी प्रतिवेदन प्रस्तुत गर्दै प्रहरी प्रधान कार्यालय युएन महाशाखाका प्रमुख प्रहरी वरिष्ठ उपरीक्षक वीरेन्द्र कुमार बस्यालले त्यसतर्फ खटि जाने समूहमा प्रहरी उपरीक्षक १, प्रहरी नायव उपरीक्षक ४, प्रहरी निरीक्षक ७, प्रहरी नायव निरीक्षक २४, प्रहरी सहायक निरीक्षक १७, प्रहरी हवल्दार ५५, प्रहरी जवान ६५ र प्रहरी कार्यालय सहयोगी ७ जना गरी जम्मा १ सय ८० जना रहेको जानकारी दिए । उक्त मिसनमा खटिएका प्रहरी कर्मचारीहरु दुई समूह गरी २०७७ कात्तिक १७ र मंसिर ११ गते त्यसतर्फ प्रस्थान गर्ने उनले जानकारी दिए ।

    समारोहमा प्रहरी अतिरिक्त महानिरीक्षकहरु, प्रहरी नायव महानिरीक्षकहरु, वरिष्ठ प्रहरी अधिकृतहरु लगायत प्रहरी अधिकृतहरुको उपस्थिति रहेको थियो ।

    श्रोत: नेपाल प्रहरी 


    कार्तिक १४, २०७७ शुक्रवार १३:४९:५५ बजे : प्रकाशित

  • सम्बन्धित विषय:

  • # मिसन जाने
  • # प्रहरी टोलीलाई बिदाइ

  • क्यानाडानेपाल

    भक्तपुरमा कोरोना संक्रमण र मृत्यु दर बढ्यो

  • 148
    SHARES
  • भक्तपुरमा कोरोना संक्रमण र मृत्यु दर बढ्यो

    काठमाडौं । भक्तपुरमा कोरोना भाइरस सङ्क्रमण र मृत्यु दर दैनिक बढ्दै गइरहेको छ । जिल्लामा शुक्रबार बिहानसम्ममा कोरोना सङ्क्रमितको सङ्ख्या पाँच हजार पाँच सय नाघेको छ । जिल्ला स्वास्थ्य कार्यालय भक्तपुरका अनुसार जिल्लामा तीन हजार १७५ पुरुष र दुई हजार ४२१ महिला गरी कोरोना भाइरस सङ्क्रमितको सङ्ख्या पाँच हजार ५९६ जना पुगेको छ ।

    त्यसैगरी जिल्लामा कोरोना भाइरस सङ्क्रमणका कारण मृत्यु हुनेको सङ्ख्या ६९ पुगेको छ । बुधबार र बिहीबार मात्रै भक्तपुरमा भाइरसकै कारण पाँचजनाको ज्यान गएको छ । भक्तपुरमा कोरोना भाइरस सङ्क्रमणका कारण मृत्यु हुने दर समग्र नेपालको दोब्बर भन्दा बढी रहेको स्वास्थ्य कार्यालय भक्तपुरका प्रमुख कृष्ण मिजारले जानकारी दिए । 

    कोरोना सङ्क्रमणबाट नेपालको समग्र मृत्युदर ०.६ प्रतिशत रहेको अवस्थामा भक्तपुरमा भने बिहीबारसम्म सङ्क्रमणबाट मृत्यु हुने दर १।२३ प्रतिशत रहेको उनको भनाइ छ ।  त्यसैगरी कोरोना भाइरस सङ्क्रमितको निको हुने दर भने भक्तपुरमा ६७.३३ प्रतिशत छ । बिहीबारसम्म दुई हजार ८१ पुरुष र एक हजार ६१८ महिला गरी तीन हजार ६९९ सङ्क्रमित निको भएर घर गएको कार्यालय प्रमुख मिजारले जानकारी दिए ।


    कार्तिक १४, २०७७ शुक्रवार १२:५४:५३ बजे : प्रकाशित

  • सम्बन्धित विषय:

  • # भक्तपुर
  • # कोरोना संक्रमण
  • # मृत्यु दर

  • क्यानाडानेपाल डेस्क

    समृद्धि र धन प्राप्तिको महत्व बोकेको कोजाग्रत पूर्णिमा, यसरी भरपूर उठाउनुहोस् फाइदा

  • 146
    SHARES
  • समृद्धि र धन प्राप्तिको महत्व बोकेको कोजाग्रत पूर्णिमा, यसरी भरपूर उठाउनुहोस् फाइदा

    काठमाडौँ।धनधान्य एवं सम्पन्नताकी देवी महालक्ष्मीको पूजाराधनासहित रात्रिमा जाग्राम बसेपछि आजदेखि बडादसैँ समापन हुँदै छ। आश्विन शुक्ल पूर्णिमाका दिन मनाइने कोजाग्रत पूर्णिमा आज साँझ सम्पन्नताकी देवी महालक्ष्मीको पूजाराधना गरी रातभर जाग्राम बसेर मनाएसँगै दुर्गा पक्ष सकिन्छ।

    शास्त्रअनुसार गर्नुपर्ने सबै बलिपूर्ति अर्थात् अखिल बलिपूर्तिको काम पनि आजै हुनेछ। अखिल बलिपूर्ति भएसँगै विजयादशमीदेखि सुरु भएको नवदुर्गाको प्रसादस्वरुप टीका र जमरा लगाई मान्यजनबाट आशीर्वाद लिने क्रम पनि आजैदेखि समाप्त हुन्छ। आजै जमरालाई नजिकको नदी, तलाउ, पोखरी आदि तीर्थस्थलमा लगी सेलाइन्छ। 

    नेपाल तथा भारतका हिन्दु समुदायमा यस पूर्णिमालाई कुमार  पूर्णिमा, कोजागिरि पूर्णिमा, कौमुदी पूर्णिमा वा शरद पूर्णिमा पनि भन्ने गरिन्छ। मनसुनको अन्त्यसँगै यसबेला खेतबाट अन्न भित्र्याउने चलन छ। हिन्दु मान्यता अनुसार शरद पूर्णिमाको बेला चन्द्रमा आफ्नो सबै १६ कलाहरुसहित प्रकट हुने गर्दछ।  

    हिन्दू धर्मकाअनुसार प्रत्येक मानवको गुण केहि निश्चित कलासँग सम्बन्धित हुन्छ र सोह्रवटा विभिन्न कलाको समायोजनले एक सिद्ध मानवको सृजना हुने गर्दछ।  त्यस्तै भगवान श्रीकृष्ण यी सबै १६ गुण वा कलाका साथ जन्मेका थिए र भगवान विष्णुको पूर्ण अवतार थिए।  यसैगरी भगवान श्री रामसँग भने केवल १२ गुण वा कला साथ जन्मेका थिए।

    यसदिन चन्द्रमा सबै १६ कलाका साथ आकाशमा चम्कने भएकाले यसको किरणहरुमा विशेष किसिमको शक्ति वा गुण हुने र यस किरणले शरीरलाई सकारात्मक पोषण दिने गर्दछ।  

    त्यसैगरि यसदिन धनकी देवी लक्ष्मी पनि पृथ्वीमा आउने र मनुष्यको सम्पूर्ण क्रियाकलाप वा गतिविधिलाई नियाल्न पृथ्वीको चारैतिर घुम्ने पुराणहरुमा उल्लेख छ।

    साथै भारतको ब्रिज क्षेत्रमा यसदिनलाई रास पूर्णिमापनि भन्ने गरिन्छ किनभने यसदिन भगवान कृष्णले प्रेमको ईश्वरीय नाँच प्रदर्शन गरेका थिए।

    यसअर्थमा, यस दिन चन्द्रमा धर्तिको नजिक आउने र चन्द्रमाको प्रकाशमा एउटा विशेष गुण हुने मान्यता छ । यसदिन चन्द्रमाको किरणको  प्रत्यक्ष लाभ उठाउन र साथै धनकी देवी लक्ष्मी पृथ्वीमा अवतरण गर्ने हुँदा रातभर जागा रही देवी लक्ष्मीको आराधनामा लागेकामा समृद्धि र धन प्राप्त हुने धार्मिक विश्वास छ । यसदिन रात भरि जागा रही भजन कीर्तन गर्ने साथै कौडा र अरु विभिन्न किसिमका जुवा खेल्ने गर्छन् । 

    धर्मशास्त्रका अनुसार यसदिन अक्षक्रीड़ामा सामेल हुनु लाभादायिक हुने मान्याता छ। तर, यस पवित्र रातको गलत अर्थलगाई आजकाल भने धर्म र संस्कृति ठेस पुर्‍याउने काम भएको र कतिपय ठाउँमा जुवाले भएभरका सबै सम्पत्ति हार्दा परिवारको विचल्ली भएका खबर बर्षाैँनी आउने गरेको छ । 


    कार्तिक १४, २०७७ शुक्रवार ०९:२०:०१ बजे : प्रकाशित

    कोरोना संक्रमण भई निको भएका काभ्रे पोस्ट साप्ताहिकका सम्पादक चौलागाईको निधन

    क्यानाडानेपाल

    कार्तिक १४

  • 510
    SHARES
  • कोरोना संक्रमण भई निको भएका काभ्रे पोस्ट साप्ताहिकका सम्पादक चौलागाईको निधन

    काठमाडौं । कोरोना भाइरस संक्रमण भई निको भएका काभ्रे पोस्ट साप्ताहिकका सम्पादक विष्णु चौलागाईको निधन भएको छ ।

    उनको शुक्रबार बिहान उपचारका क्रममा निधन भएको हो ।

    कोरोनालाई जिते पनि कडा निमोनिया र श्वासप्रश्वासका कारण चौलागाईको निधन भएको चिकित्सकहरूले जनाएका छन् ।

    काभ्रेमा पत्रकारिताको विकास गर्न चौलागाईको योगदान धेरै छ ।


    कार्तिक १४, २०७७ शुक्रवार ०९:१८:०२ बजे : प्रकाशित

    images
    ताजा खबर