काठमाडौँ– एनआईसी एशिया बैंकका प्रमुख कार्यकारी अधिकृत रोशनकुमार न्यौपाने 'म्यानेजर अफ दी इयर - २०२२' बाट सम्मानित भएका छन् ।
म्यानेजमेन्ट एसोसिएसन अफ नेपाल (म्यान) ले व्यवस्थापन क्षेत्रमा पुर्याएको योगदान र अनुकरणीय नेतृत्व कुशलताको कदर गर्दै आफ्नो साधारणसभाका अवसरमा शनिबार न्यौपानेलाई उक्त सम्मानबाट सम्मानित गरेको हो ।
न्यौपानेले पाँच वर्षदेखि उक्त बैंकको नेतृत्व सम्हाल्दै आएका छन् । उनको नेतृत्व अवधिमा बैंकको कुल कर्जा करिब रू. ७३ अर्बबाट करिब ४ गुणाले वृद्धि भइ रू. २७४ अर्ब पुगेको बैंकले जनाएको छ । साथै निक्षेप संकलन पनि ८६ अर्बबाट करिब ४ गुणाले वृद्धि भइ रू. ३०० अर्ब पुगेको छ । बैंकको प्रतिशेयर आम्दानीतर्फ करिब २ गुणाले वृद्धि भइ रू. ४१.४३ पुगेको छ ।
सम्मानित भएपछि उनले यो सम्मानले आफूलाई थप हौसला प्रदान गरेको बताएका छन् ।
‘म्यानेजर अफ द इयर अवार्ड’बाट सम्मानित हुन पाउँदा म असाध्यै हर्षित महसुस गर्छु। यो अभूतपूर्व सम्मान पाउनु मेरो लागि साँच्चै नै ठूलो सौभाग्यको कुरा हो’ उनले भने, ‘मेरो हौसला, मनोबल र आत्मविश्वासलाई बलियो बनाउनुका साथै अविश्वसनीय अवसर तथा चुनौतीपूर्ण चुनौतीहरूको सामना गर्नु भएकोमा मेरो परिवार, सहकर्मीहरू र एनआईसी एशिया बैंकका प्रत्येक एकल सरोकारवालाहरूप्रति म कृतज्ञ छु।’
सीईओ न्यौपाने प्रबल जनसेवा श्री (चतुर्थ), कर्पोरेट सीईओ अफ द इयर - २०७८ र ग्लोबल बिजिनेस आउटलुक (जीबीओ) लण्डनबाट बैंकिङ सीईओ अफ द इयर - नेपाल २०२१ बाट समेत सम्मानित भइसकेका छन् ।
