काठमाडौँ– चेल्सीलाई पराजित गर्दै रियल मड्रिड च्याम्पियन्स लिग फुटबलको सेमिफाइनल प्रवेश गरेको छ ।
मंगलबार राति क्वार्टरफाईनलको दोस्रो लेगमा जित निकाल्दै स्पेनिस क्लब रियल सेमिफाईनल प्रवेश गरेको हो । चेल्सी भने क्वार्टरफाईनलमै प्रतियोगिताबाट बाहिरिएको छ ।
दोस्रो लेगको खेलमा रियल मड्रिडले चेल्सीसँग २–३ को हार ब्यहोर्यो । तर समग्रमा ५–४ को नतिजासहित रियल अन्तिम चारमा प्रवेश गरेको हो । पहिलो लेगमा रियल ३–१ गोल अन्तरले अघि थियो ।
खेलमा उत्कृष्ट पुनरागमन गर्दै चेल्सी एक समय सेमिफाईनल नजिक थियो । तर वैकल्पिक खेलाडीको रुपमा मैदान छिरेका रोड्रिगोले रियललाई बराबरीमा ल्याएका थिए । थपिएको अतिरिक्त समयमा करिम बेन्जिमाले हेड गोल गर्दै रियललाई सेमिफाईनलको यात्रा तय गराए ।
रियलको घरेलु मैदानमा चेल्सीले लगातार तीन गोल गर्दै खेलमा उत्कृष्ट पुनरागमन गरेको थियो । मिसन माउन्टले १५ औं मिनेटमा लण्डन क्लबलाई अघि बढाएका थिए ।
दोस्रो हाफमा रुडिगरले हेडमार्फत चेल्सीको अग्रतालाई दोब्बर बनाए । टिमो बार्नरले ७५ औं मिनेटमा गोल गर्दै चेल्सीलाई उत्कृष्ट पुनरागमन दिलाएका थिए ।
रियल पछिल्लो १२ सिजनमा १० औं पटक च्याम्पियन्स लिगको सेमिफाईनलमा प्रवेश गरेको हो ।
