काठमाडौं— नेपाली चलचित्रका कलाकार पल शाह प्रकरणमा पीडित नाबालिगका बुवाले पनि बयान फेरेका छन् । मंगलबार जिल्ला अदालत तनहुँमा बकपत्र गर्ने क्रममा किशोरीको बुबाले आफैले जाहेरी दिएको तर पछि बुझ्दै जाँदा त्यो कुरा यथार्थ नभएको भनी बयान दिइ होस्टाइल बनेका छन् । त्यसो त, गत आइतबार मात्र बकपत्रका क्रममा पीडित किशोरीले पनि आफूमाथि बलात्कार नभएको बयान दिएकी थिइन् । पीडित किशोरीले जाहेरीमा उल्लेखित विवरणहरु कसैको उक्साहटमा लेखिएको जिकिर गर्दै प्रहरीले जबरजस्ती विभिन्न कागजातहरुमा हस्ताक्षर गर्न लगाएको उनले दाबी गरेकी थिइन् । उनले छोरीले फेरेको बयान मान्छु भन्दै होस्टाइल गरेको जिल्ला अदालत तनहुँले जनाएको छ । अदालतले तनहुँमा बकसपत्र गर्ने क्रममा नाबालिग गायिकाका बुबाले पनि जबर्जस्ती करणी नभएको बयान दिएको अदालतका एक वकिलले बताए । होस्टाइल गर्नेलाई तीन महिना कैद र पाँच हजार जरिवाना हुने कानुनी व्यवस्था रहेको ती वकिलले बताए ।