बिहिबार अत्यन्त गोप्य रुपमा नायिका केकी अधिकारीले विवाह गरेकी छिन । केकीले ३ वटा तस्विर सार्वजनिक गर्दै विवाहको जानकारी दिए पनि विवाह बारे अन्य सबैकुराहरु गोप्य नै छन् । यद्यपी केकीको विवाह बारेका केही विषयहरु चुहिन थालेका छन् । स्रोतका अनुसार ग्रान्डी अपार्टमेन्ट भित्रै केकीको विवाह सम्पन्न भएको हो । यो उनका श्रीमान् रोहित तिवारी बस्दै आएको अपार्टमेन्टमा हो । विवाहमा दुवै तर्फका गरेर करिब सय जना पाहुना उपस्थित थिए । चलचित्र क्षेत्रका ब्यक्तिहरु भने खासै कोही थिएनन् । केकीका नजिकका साथी हरु पनि विवाहमा निम्त्याइएका थिएनन् । विवाहलाई गोप्य राख्न केकीले सक्दो कोसिस गरेकी थिइन । उनले विवाहको तस्विर र भिडियो खिच्ने काम टौवा इभेण्टले गरेको थियो । स्रोतका अनुसार केकीले टौवासँग विवाहका बारे कुनै पनि जानकारी सार्वजनिक नगर्ने मात्र होइन आफ्नो अनुमति विना तस्विर र भिडियो पनि सार्वजनिक गर्न नपाउने लिखित सम्झौता नै गरेकी थिइन । त्यसो त उपस्थिती पाहुनाहरुलाई समेत मोबाइलबाट फोटो वा भिडियो खिच्न बन्देज लगाइएको थियो । अफिसियल फोटोग्राफर बाहेक अरुले केकीको बिहेको कुनै पनि दृश्य र तस्वीर कैद गर्न पाएनन् । यति सम्मकी पाहुनाहरुलाई विवाह स्थल प्रवेशसँगै मोबाइल फोन समेत अफ गर्न लगाइएको थियो ।