काठमाडौँ– रामबाबु गुरुङ निर्देशित चलचित्र ‘कबड्डी ४’ ले प्रदर्शन अगावै दुई करोड कमाएको छ । विश्व बजारमा राइट बिक्रीबापत चलचित्रले दुई करोड रुपैयाँ कमाएको हो ।
आगामी १३ जेठमा प्रदर्शन मिति तय भएको उक्त चलचित्रले विदेशमा बिक्रीबापत प्राप्त दुई करोड र डिजिटल राइटसहित चलचित्रको लगानी सुरक्षित गरिसकेको निर्माण टिमको भनाइ छ ।
चलचित्रको अघिल्ला तीन सिक्वेलभन्दा चौथोले विदेशबाट अहिलेसम्मकै उच्च कमाइ गरेको हो । युरोप, अमेरिका, अस्ट्रेलिया, बेलायत, न्युजिल्याण्ड, हङकङ, जापान र भारतमा राइट बिक्री भइसकेको छ । अस्ट्रेलिया र बेलायतमा उच्च मूल्यमा राइट बिक्री भएको छ । अब चलचित्र विदेशी मुलुकका साथै नेपालमा एकै दिन रिलिज हुने छ ।
भारतमा चाहिँ नेपाल रिलिजको एक सातापछि मात्र चलचित्र प्रदर्शन हुने छ । रामबाबु गुरुङको निर्देशनमा तयार भएको चलचित्रमा बुद्धि तामाङ, विजय बराल, गौमाया यात्री, पुष्कर गुरुङ, कमलमणि नेपाल, कविता आले, जयनन्द लामा, प्रकाश घिमिरे, माओत्से गुरुङ, शारदा अधिकारी लगायतको अभिनय छ ।
चलचित्रलाई निर्देशक गुरुङ र उपेन्द्र सुब्बाले मिलेर लेखेका हुन् । निमेष श्रेष्ठको सम्पादन रहेको चलचित्रलाई शैलेन्द्र डी. कार्कीले छायांकन गरेका हुन् ।
