काठमाडौँ– भारतको नागरिकता पाउने आशामा राजस्थानमा बसोबास गरिरहेका करिब आठ सय पाकिस्तानी हिन्दू स्वदेश फर्किएका छन् ।
भारतमा पाकिस्तानी अल्पसंख्यक प्रवासीहरुको अधिकारका लागि आवाज उठाउँदै आएको संस्था सीमान्त लोक संगठकन (एसएलएस) ले सन् २०२१ मा सो संख्यामा पाकिस्तानी हिन्दु स्वेदश फिर्ता भएको दाबी गरेको हो ।
भारतीय अंग्रेजी पत्रिका द हिन्दूले प्रमुखताका साथ छापेको उक्त समाचारमा नागरिकताका लागि आवेदन दिएपछिको प्रक्रियामा कुनै प्रगति नभएपछि नागरिकता पाउने आशा परित्याग गर्दै प्रवासी हिन्दू पाकिस्तान फिर्ता भएको जनाइएको छ । यो तथ्यांक सन् २०२१ को मात्रै रहेको समाचारमा उल्लेख गरिएको छ ।
एसएलएसका अध्यक्ष हिन्दू सिंह सोढालाई उद्धृत गर्दै उक्त पत्रिकाले लेखेको छ, ‘यसरी स्वदेश फिर्ता भएकाहरुलाई पाकिस्तानी एजेन्सीले भारतको बदनाम गर्न प्रयोग गर्छन् । मिडियाको अगाडि ल्याएर उनीहरुलाई भारतमा आफूहरुमाथि नराम्रो दुव्र्यवहार भएको बयान दिन बाध्य पारिन्छ ।’
भारतको गृह मन्त्रालयले सन् २०१८ मा नागरिकता आदेवनका लागि अनलाइन प्रक्रिया सुरु गरेको थियो ।
मन्त्रालयले सात राज्यमा पाकिस्तान, अफगानिस्तान तथा बंगलादेशबाट आउका हिन्दू, सिख, पारसी, जैन तथा बौद्ध व्यक्तिलाई नागरिकता प्रदानका लागि अनलाईन आवेदन लिन निर्देशन दिएको थियो ।
प्रवासी सम्बन्धी नागरिकता कानुन १९५५ को धारा ५ र ६ अनुसार नागरिकता दिन सम्बन्धित अधिकारीलाई अधिकार प्रदान गरिएको छ ।
यद्यपि, सबै प्रक्रियालाई अनलाइन गरिएपनि म्याद सकिएका पाकिस्तानी पासपोर्टलाई भने अनलाइन पोर्टलले स्वीकार गर्दैन । जसका कारण पासपोर्ट नवीकरणका लागि दिल्लीस्थित पाकिस्तानको उच्चायोग जानु पर्ने र त्यसका लागि महंगो खर्च व्यहोर्नु पर्ने शरणार्थीहरुको बाध्यता रहेको छ ।
अध्यक्ष सिंहका अनुसार राजस्थानमा मात्रै अझै २५ हजार पाकिस्तानी हिन्दू नागरिकताको पर्खाइमा रहेका छन् । जसमध्ये केही व्यक्ति दुई दशकदेखि नागरिकताको पर्खाइमा रहेका छन् ।
