काठमाडौँ– स्थानीयको अवरोधकाबीच धादिङको धुनिबेंसीस्थित बन्चरेडाँडा ल्याण्डफिल साइटमा फोहोर बिसर्जन गर्न थालिएको छ ।

निर्माणाधिन बन्चरेडाँडा ल्याण्डफिल साइटमा काठमाडौं उपत्यकाको फोहोर बिसर्जन सुरु भएको पहिलोपटक हो ।

आज बिहान ९० वटा गाडीले बन्चरेडाँडा ल्याण्डफिल साइटको सेल–१ मा फोहोर बिसर्जन गरेको काठमाडौं महानगरपालिका वातावरण विभागकी निमित्त प्रमुख सरीता राईले जानकारी दिइन् ।

शहरी विकास मन्त्री रामकुमारी झाँक्रीको समन्वयमा मन्त्रालयले बनाएको बन्चरेडाँडाको ल्याण्डफिल साइटमा फोहोर बिसर्जन सुरु भएको राईले बताइन् ।

स्थानीयले विभिन्न माग राखेर बन्चरेडाँडामा अहिलेकै अवस्थामा फोहोर बिसर्जन गर्न नदिने अडान राख्दै आएका थिए । तर सोमबार गृहमन्त्रालयमा बसेको सरोकारवालाको बैठकले बल प्रयोग गरेर भए पनि बन्चरेडाँडामा फोहोर बिसर्जन गर्ने निर्णय गरेको थियो । आज फोहोर बोकेका गाडीहरु बन्चरेडाँडा पुग्दा प्रहरीले सुरक्षा दिएका थिए ।

स्थानीयले भने आफूहरुसँग समन्वय नगरेको र आफ्ना माग सम्बोधन नगरी फोहोर बिसर्जन गर्न सुरु गरेको भन्दै आन्दोलन गर्ने चेतावनी दिएका छन् ।

सिसडोलस्थित ल्याण्डफिल साइट भरिएपछि काठमाडौं उपत्यकाको फोहोर बिसर्जन हुन सकेको थिएन । बन्चरेडाँडामा फोहोर फाल्न सुरु गरेपछि अब सहज हुने विश्वास छ ।