काठमाडौं । एक्सन जनरामा म्यूजिक भिडियो ‘गन्तव्य’ सार्वजनिक भएको छ । भिडियोमा अभिनेत्री सुरक्षा पन्तलाई एक्सन अवतारमा देखाइएको छ । आरके खत्रीको स्वरमा रहेको गीतमा सूर्य अधिकारीको र्याप, गायक खत्रीकै मेलोडी तथा खत्री र अधिकारीको शब्द छ ।

भिडियोमा सुरक्षाको अपोजिटमा निराजन प्रधान छन् । पैसाका लागि गलत काममा होमिएका उनीहरुबीचको प्रेम र पैसाका लागि निराजनले सुरक्षामाथि गर्ने गलत व्यवहारको कथा भिडियोमा देखाइएको छ ।

हरी हुमागाईंको निर्देशन रहेको भिडियोमा शंकर महर्जनको द्वन्द्व, प्रविन श्रेष्ठको कलर, राजेश शाहको भिएफएक्स र दीपु पौडेलको मेकअप छ । उत्तम हुमागाईं र राजेन्द्र हुमागाईंले छायांकन गरेको भिडियो देवन प्रोडक्सनले निर्माण गरेको हो ।