काठमाडौं – बलिउड अभिनेता अक्षय कुमारको फिल्म सम्राट पृथ्वीराज अहिले निकै चर्चामा छ । अक्षय अहिले यसै फिल्मको प्रमोशनमा व्यस्त छन् । फिल्म जुन ३ गते प्रदर्शनमा आउँदेछ । चन्द्रप्रकाश द्विवेदीको निर्देशनमा बनेको यस फिल्मको नाम शुरुमा पृथ्वीराज रहेको थियो । तर करणी सेनाको विरोधका कारण फिल्मको नाम सम्राट पृथ्वीराज राखियो । प्रमोसनको क्रममा अक्षयले आफ्ना कुराहरु दर्शकहरुलाई खुलाएका छन् । एक दर्शकले तपाईं एकदिनका लागि प्रधानमन्त्री बनेमा के गर्नुहुन्छ भनेर प्रश्न गरे । जसको जवाफमा अक्षयले आफू अभिनयको सानो संसारमै खुशी रहेको बताए । आफू प्रधानमन्त्री बन्न योग्य नरहेको भन्दै उनले प्रधानमन्त्री हुँदा आफूले धेरै काम गर्न सक्ने जस्तो नलाग्ने र आफू मनोरञ्जनमा नै ठिक हुने बताए । फिल्म सम्राट पृथ्वीराजमा अक्षय कुमारसँगै सोनु सूद, मानुषि छिल्लर र सञ्जयदत्तको मूख्य अभिनय रहेको छ ।