मुम्बई—अभिनेत्री मनीषा कोइरालाको अभिनय रहने बहुप्रतिक्षित वेब सिरिज ‘हीरामण्डी’ चाँडै डिजिटल विश्वमा पाइला चाल्दैछ । ओटीटी प्लेटफर्म नेटफ्लिक्सले निर्माण गरेको यो अहिलेसम्मकै सबैभन्दा महंगो वेब सिरिज हो । सिरिजका निर्देशक सञ्जय लीला भन्साली सिरिजप्रति आत्मविश्वासी बनेका छन् । नेटफ्लिक्सले ‘हीरामण्डी’का लागि हालसम्म करिब दुई सय करोड बढी खर्च गरिसकेको छ । यसमा निर्देशकसहित कलाकारको पारिश्रमिक जोडिएको छ । ‘भन्सालीलाई यो वेब सिरिजको एक भाग निर्देशन गर्न करिब ५० देखि ६० करोड पारिश्रमिक लिएका छन् । बाँकी दुई सय करोडको बजेट सिरिजको प्रोडक्सन र अन्य कलाकारको पारिश्रमिकमा खर्च हुनेछ’, वेबसिरिज निकट स्रोतले भनेको छ । सिरिजका लागि मनीषासहित सोनाक्षी सिन्हा, हुमा कुरैशी र ऋचा चड्डाले पारिश्रमिकमा कटौती पनि गरेका छन् । सिरिजको लागि प्रमुख अभिनेत्रीको कास्ट हाल भइरहेको छ । यो सिरिजको एक भागको निर्देशन भन्सालीले गर्ने भए पनि बाँकी ६ भाग ‘बाजीराव मस्तानी’ र ‘पद्यावत’का सहायक निर्देशक मिताक्षरा कुमारले गर्नेछन् । ‘हीरामण्डी’ एक कष्ट्युम ड्रामा वेब सिरिज हो, यो यौनकर्मीको कथामा आधारित छ । यो सिरजका लागि फिल्मसिटीमा एक ग्राण्ड सेट तयार गरिएको छ । जसको लागत करिब १ करोड ७५ लाख रुपैंयाँ छ । यसमा सन् १९४५ को समयको लाहौरलाई देखाइनेछ । —बलिउड हंगामा