मुम्बई–केकेका रुपमा परिचित लोकप्रिय भारतीय गायक कृष्णकुमार कुन्नथको अन्तिम पोस्टमार्टम र अटोप्सी शनिबार कोलकाता प्रहरीलाई हस्तान्तरण गरिएको छ । दुवै रिपोर्टमा गायकको मृत्युको कारण ‘मायोकार्डियल इन्फार्क्सन’ मानिएको छ । रिपोर्ट अनुसार कोलेस्ट्रोलको सञ्चयले इन्ट्रामस्क्युलर धमनीलाई निकै संकुचित बनाएपछि मुटुबाट रगतका पम्पिङ प्रभावित भएको थियो । यहीकारण कोरोनरी धमनीमा पनि रोकावट आएका थियो । यता कोलकाता प्रहरीले गायकको अप्राकृतिक मृत्युको सम्बन्धमा प्रारम्भिक उजुरी दर्ता गरेर अनुसन्धान सुरु गरेको छ । ‘तर प्रारम्भिक र अन्तिम पोस्टमार्ट रिपोर्टसँगै रासायनिक विश्लेषणपछि अब अप्राकृतिक मृत्युको सिद्धान्तलाई अस्वीकार गरिएको छ,’ नाम नबताउने शर्तमा एक प्रहरी अधिकृतले भनेका छन् । गत मंगलबार साँझ गायक केकेले दक्षिण कोलकाताको नजरुल मञ्चमा प्रस्तुति दिइरहँदा अस्वस्थ भएका थिए । त्यसपछि उनलाई अस्पताल लैजादा उनको मृत्यु भएको थियो । –एबीपी लाइभ