काठमाडौँ– आईसीसी पुरुष क्रिकेट विश्वकप लिग टू अन्तर्गत त्रिकोणात्मक सिरिजको पहिलो खेलमा नेपाल ओमानसँग १३ रनले पराजित पराजित भएको छ ।
अमेरिकाको टेक्ससस्थित मोसा क्रिकेट मैदानमा शुक्रबार बिहान सकिएको खेलमा २ सय १२ रनको लक्ष्य पछ्याएको नेपाल ४९ ओभर ४ बलमा १ सय ९८ रनमा अलआउट भयो ।
आरिफ शेखले ६६ रन तथा देव खनालले ३४ रन बनाएपनि अन्य ब्याटरले गतिलो योगदान गर्न सकेनन् । रोहित पौडेलले २० र दिपेन्द्र सिंह ऐरीले १६ रन, विनोद भण्डारीले १४, सोमपाल कामीले १३, डेब्यु खेलाडी सुनिल धमलाले १२, करण केसीले ८ सुवास खकुरेलले ३ तथा कप्तान सन्दीप लामिछाने २ रनमात्र बनाउन सके ।
ओमानका जिसन मक्सुद र खवर अलिले तीन तीन तथा बिलाल खानले दुई विकेट लिए । टस जितेर पहिले ब्याटिङ गरेको ओमानले ५० ओभरमा ८ विकेट गुमाएर २ सय ११ रन जोडेको थियो ।
ओमानका लागि जिसन मक्सुदले अविजित रहदै १ सय ४ रन बनाए । नेपालका करण केसीले ५ तथा कप्तान सन्दीप लामिछानेले २ र सोमपाल कामीले १ विकेट लिए ।
करण सोमपाल कामी र सन्दीप लामिछाने पछि एकदिवसीय अन्तराष्ट्रियको एकै खेलमा ५ विकेट लिने नेपालका तेस्रो खेलाडी बनेका छन् ।
हारसँगै नेपाल १३ खेलमा १२ अंक जोडेर छैटौं स्थानमा रहेको छ । ओमान ३३ खेलमा ४२ अंक जोडेर शीर्ष स्थानमा रहेको छ ।
अब नेपालले दोस्रो खेलमा अमेरिकाविरुद्ध शनिबार खेल्नेछ ।
नेपालले तेस्रो खेलमा फेरि ओमानविरुद्ध आगामी मंगलबार (जेठ ३१) र अन्तिम खेलमा नेपालले अमेरिकाविरुद्ध असार १ गते खेल्ने तालिका रहेको छ ।
