लसएञ्जल्स– पिताको संरक्षकत्वबाट स्वतन्त्र भएको करिब ६ महिना पछि गायिका ब्रिटनी स्पीयर्सले प्रेमी साम असघरीसँग विवाह गरेकी छन् । लसएञ्जल्समा बिहीबार आयोजित एक गोप्य वैवाहिक समारोहमा उनीहरुले विवाह गरेका हुन् । गत वर्ष ४० वर्षे गायिका ब्रिटनीले अदालतमा १३ वर्षसम्मको पिताको संरक्षकत्वले आफूले विवाह गर्न र सन्तान पाउन असक्षम रहेको बताएकी थिइन् । गत नोभेम्बरमा संरक्षकत्वबाट स्वतन्त्र भएपछि ब्रिटनी मेमा गर्भवती भएकी थिइन् । तर उनको गर्भपतन भएको थियो । स्पीयर्स र असघरीको भेट सन् २०१६ मा ब्रिटनीको गीत ‘स्लम्बर पाटी’ को सुटिङको बेला भएको थियो । उनीहरुको इन्गेजमेन्ट ब्रिटनी स्वतन्त्र हुनुभन्दा दुई महिना अघि भएको थियो । –बीबीसी