मुम्बई— बलिउड अभिनेत्री सोनम कपूरकी बहिनी रियाले केही दिन अघि सोनमको केही तस्वीर सामाजिक सञ्जालमा शेयर गरेकी थिइन्, जसमा सोनमले आफ्नो बेबीबम्प देखाएकी थिइन् । अहिले सोनम यही तस्वीरका कारण ट्रोल बनेकी छन् । ट्रोलरले उनलाई हलिउड स्टार रिहाना बन्ने भूत चढेको भन्दै आलोचना गरिरहेका छन् । रिहाना पनि हालका दिनमा गर्भवती छिन् र बाहिर घुम्न निस्कदा उनले बेबीबम्प सार्वजनिक रुपमै देखाइरहेकी छन् । सोनमको तस्वीरमा उनलाई पनि रिहानाको जस्तै ट्युब टप लगाएर बेबीबम्प गरिएको देख्न सकिन्छ । ‘यो त रिहानाको कपि भइरहेको छ’,एक प्रयोगकर्ताले लेखेका छन् । अर्का प्रयोगकर्ता लेख्छन्,‘बलिउडवाला यस्तो के सोच्छन् कि उनीहरुमात्र गर्भवती हुन्छन् । तर के कोही महिला बजारमा यस्तो कपडा लगाएर निस्कन्छन् । बलिउडवाला पनि कति देखाउछन् ।’ सोनमले निकै रोमान्टिक शैलीमा आफ्नो गर्भवतीको खबर सार्वजनिक गरेकी थिइन् । सोनमले आनन्द आहुजासँग निकै लामो समयको डेटपछि विवाह गरेकी थिइन् । —बलिउडलाइफ