काठमाडौँ - युवा तथा खेलकुदमन्त्री महेश्वर गहतराज (अथक) मस्को पुगेका छन् । सोमबार बिहान नेपाली प्रतिनिधि मण्डलको नेतृत्व गर्दै रुसको पाँच दिने औपचारिक भ्रमणमा निस्किएका मन्त्री अथक दुबई हुँदै आज बिहान रुसको राजधानी मस्को पुगेका हुन् ।
मस्को विमानस्थलमा मन्त्री अथकसहितको नेपाली प्रतिनिधि मण्डललाई नेपाली दूतावास तथा एनआरएन का प्रतिनिधिले स्वागत गरेका छन् । रसिया सरकारका खेलकुदमन्त्री ओलेग भी म्याटिसिनको औपचारिक निमन्त्रणामा रुस पुगेका मन्त्री अथकले आजै खेलकुदमन्त्री म्याटिसिनसँग शिष्टाचार भेट गर्ने कार्यक्रम रहेको मन्त्रालयका सचिव दामोदर रेग्मीले जानकारी दिएका छन् ।
पाँच दिने भ्रमणका क्रममा मन्त्री अथकले ‘रसिया-नेपाल खेलकुद सहयोग कार्ययोजना २०२२-२०२३’ मा हस्ताक्षर गर्ने कार्यक्रम रहेको छ । यस्तै रुसले खेलकुद क्षेत्रको विकासका लागि अवलम्वन गरेको नीति तथा खेलकुद विश्वविद्यालय सञ्चालनको प्रक्रियाका बारेमा समेत जानकारी लिनुका साथै अन्तर्राष्ट्रिय रङ्गशाला तथा खेलकुद संग्राहलयको समेत अनुगमन गर्ने कार्यक्रम रहेको छ ।
भ्रमणकै दौरान मन्त्री अथकले अन्तर्राष्ट्रिय बक्सिङ संघका अध्यक्ष उमार क्रेमलेम, बक्सिङ महासंघ रसियाका महासचिवलगायत विभिन्न खेलसँग सम्बन्धित संस्थाका प्रतिनिधिहरुसँग नेपालको समग्र खेलकुद क्षेत्रको विकास तथा पारस्परिक सहयोगका विषयमा समेत कुटनैतिक भेटघाट तथा छलफल गर्नेछन् । मन्त्रालयका सचिव डा. दामोदर रेग्मीसहित रुसको भ्रमणमा रहेका मन्त्री अथक असार ३ गते स्वदेश फर्कने कार्यक्रम रहेको छ ।
