काठमाडौँ– नेकपा माओवादी केन्द्रका अध्यक्ष पुष्पकमल दाहाल प्रचण्डले पूर्व माओवादीहरु एक ठाउँमा आउने वातावरण बनेको बताएका छन् । फेरि विभाजनलाई निशेध गरेर एकताले ठाउँ लिँदै गएको उल्लेख गर्दै प्रचण्डले पूर्व माओवादीहरु एक ठाउँमा उभिनु पर्ने बताएका हुन् ।
आइतबार काठमाडौँमा नेपाल राष्ट्रिय कर्मचारी महासंघको केन्द्रीय समितिको बैठकलाई सम्बोधन गर्दै प्रचण्डले भने, ‘सबै पूर्व माओवादीहरु एक ठाउँमा आउने वातावरण बनेको छ। फेरि विभाजनलाई निशेध गरेर एकताले ठाउँ लिँदैछ। छिटै कुरो टुंगोमा पुग्दै छ।’
उनले यो परिवर्तनलाई संस्थागत गर्दै यसमा टेक्दै अझै अघि बढ्ने संघर्षमा आफूहरु रहेको उल्लेख गरे ।
यस्तै अध्यक्ष प्रचण्डले संघीय निजामति ऐनका लागि गठबन्धनमा सहमति जुटाउने आश्वासन दिएका छन् ।
उनले कर्मचारीतन्त्रकै माथिल्लो अफिसरले ऐन रोकेर राखेको उल्लेख गर्दै आफूहरुले अगाडि बढाउने प्रयास गरिरहेको बताए ऽ
उनले भने,‘सदनको बैठकबाट पारित गरेर गएको छ । लामो समयदेखि प्रधानमन्त्रीको कार्यालयमा रहिराखेकै अवस्था छ । र, त्यसलाई अगाडि बढाउने सम्बन्धमा कर्मचारीतन्त्रको माथिल्लो तहको अफिसरबाट नै केही न केही व्यवधान भइराखेको छ । हामी बल गर्दैछौँ ।’
