काठमाडौं– निर्देशक परिच्छेद सेनको डेब्यू निर्देशन रहेको फिल्म ‘प्रेमगन्ज’को शीर्ष गीत ‘माथि माथि आकाशमा’ रिलिज भएको छ । गीतमा बेनिशा हमाल, तेज गिरि, राइडर प्रशन, सुप्रिया खनाल फिचर्ड छन् । फिल्मले दुई कालखण्डको प्रेमकथालाई प्रस्तुत गरेको छ । बेनिशा र तेजले युवा उमेरका ‘मैना’ र ‘राजा’को भूमिकामा अभिनय गरेका छन भने सुप्रिया र राइडरले टिनएजर ‘मैना’ र ‘राजा’को भूमिका निर्वाह गरेका छन् । गीतको कोरियोग्राफीमा एकअर्कामा अगाध प्रेम देखाइए पनि एकले अर्कोलाई नछोई प्रेमभाव प्रदर्शन गरेका छन् । कोरियोग्राफीको यो शैलीलाई प्रष्ट पार्दै परिच्छेद भन्छन्, ‘फिल्मको टर्निङ पोइन्ट त्यही नै हो र फिल्मको सम्पूर्ण कथा उनीहरूको त्यही माया गर्ने शैली भित्र लुकेको छ ।’ फिल्मको टिजरमा पनि राजाले मैनाको छायाँलाई स्पर्श गर्ने कोशिस गरेको दृश्य देख्न सकिन्छ । टिनएजदेखि युवाअवस्थासम्म एकले अर्कोलाई नछोई कसरी प्रेम गर्न सके ? यो कौतुहलता मेटाउन हल जानुपर्ने निर्देशक परिच्छेदको जिकिर छ । गीतको कोरियोग्राफी निर्देशक परिच्छेद स्वयंले गरेका हुन् । फिल्मको गीतमा पुरुषोत्तम ढुङ्गेलको शब्द रचना छ भने किरण भुसालको संगीत रहेको छ । सुगम पोख्रेल र अस्मिता अधिकारीको स्वर रहेको गीतको दृश्यमा सञ्जय लामाको छायांकन छ । अनन्तमान श्रेष्ठ कार्यकारी निर्माता रहेको फिल्मको लेखक पनि परिच्छेद सेन नै हुन । फिल्ममा बेनिशा हमाल, तेज गिरीका अलावा सुरक्षा पन्त, सम्पदा बानियाँ, राइडर प्रशान्त, सुप्रिया खनाल, सिमरन खड्का, पबन भट्टराई, नरेश पौडेल, रश्मि भट्ट, गीता अधिकारी, सन्जोग रसाइलीको आदि कलाकारको अभिनय रहेको छ । राजु फुयाँलको प्रस्तुति रहेको फिल्म चलचित्र चौतारीको ब्यानरमा बनेको हो । फिल्मको ट्रेलर साउन १० गते रिलिज हुँदैछ । फिल्म आगामी भदौ ३ गते रिलिज हुनेछ । https://www.youtube.com/watch?v=Hu1CuO2wd3o