काठमाडौं–राष्ट्रिय जनसाहित्यिक सङ्घ नेपालको मासिक अविरल जनसाहित्य यात्राको ६९औँ शृङ्खलामा कवि डा भागवत आचार्यका एक दर्जन कविता प्रस्तुत भएका छन् ।
कार्यक्रममा राष्ट्र, राष्ट्रियता र श्रमिक वर्गका भाव तथा भावनाहरू अभिव्यक्त डा आचार्यका गद्य र पद्य कविताका साथै गीतसमेत प्रस्तुत गरिएको थियो । हाल नेपाल राष्ट्र बैंकमा उपनिर्देशक रहेका डा आचार्य पूर्वप्राध्यापक पनि हुन् ।
उनका कवितामाथि समीक्षा गर्दै नेपाल प्रज्ञा प्रतिष्ठानका सदस्यसचिव जगतप्रसाद उपाध्यायले आचार्यका कविताले समयबोधका साथै जनपक्षीय चिन्तनलाई आत्मसात् गरेको बताए ।
राष्ट्रिय जनसांस्कृतिक महासङ्घका उपाध्यक्ष आरसी न्यौपानेले स्रष्टाहरुले क्रान्तिचेतलाई सधैँ जीवन्त राख्नुपर्नेमा जोड दिँदै अविरल यात्राले त्यो कडीलाई जोडेको बताए । सङ्घका अध्यक्ष राम विनयले सबैले सबैलाई गर्न मिल्ने वर्गीय प्रेम भएकाले त्यही प्रेमले आफूहरूलाई एकापसमा बाँधेको र सिर्जनाका माध्यमबाट वर्गीयता प्रकट गराउनुपर्ने खाँचो औल्याए ।
प्रकाशित मिति: शुक्रबार, मंसिर ९, २०७९ ०१:१६
प्रतिक्रिया दिनुहोस्
