काठमाडौं– किराँत एकेडेमीले ‘किराँत एकेडेमी पुरस्कार’का लागि सात कृतिले प्रतिष्पर्धा गर्ने भएका छन् । एकेडेमीले सार्वजनिक गरेको प्रारम्भिक सूचीमा गणेश अधिकारीको उपन्यास ‘डायरीमा रामप्रसाद राई’, विप्लव ढकालको ‘भोजपुरको वाङ्मय’, डीपी ढकालको ‘समाजवाद र नेपाल’ तथा केवल बिनाबीको कवितासंग्रह ‘यादहरूको संग्रहालय’ छन्।
त्यसैगरी राजकुमार दिक्पालको ‘आदिवासी विद्रोहको इतिहास’, रमेशप्रसाद भट्टराईको ‘आधुनिक नेपाली उपन्यासको सांस्कृतिक विश्लेषण’ र रामराज रेग्मीको ‘नेपालको इतिहास एक मार्क्सवादी अध्ययन’ छन् ।
एकेडेमीका अध्यक्ष भुपाल राई र महासचिव चेतनाथ धमलाद्वारा जारी विज्ञप्तिमा प्रतिरोधी साहित्य, क्षेत्रीय एवम् समावेशी वाङ्मयको अध्ययन, समाजवादी अर्थराजनीति, दलित सौन्दर्य चेतनालाई कृति छनोटको आधार बनाइएको उल्लेख छ। त्यस्तै उपेक्षित इतिहासको अध्ययन, समालोचनामा नयाँ आयाम र इतिहासको भौतिकवादी अध्ययनजस्ता आधारमा कृति छानिएको जनाइएको छ ।
यसअघि यो पुरस्कार युग पाठकको ‘उर्गेनको घोडा’ र झलक सुवेदीको ‘ब्रिटिश साम्राज्यका नेपाली मोहरा’लाई दिइएको थियो। पुरस्कारको राशि ५० हजार रुपैयाँ छ।
प्रकाशित मिति: शुक्रबार, मंसिर ९, २०७९ ०३:०७
प्रतिक्रिया दिनुहोस्
