काठमाडौँ - काठमाडौंको बुद्धनगरस्थित केएमसी स्कुलकी कर्मचारी रमा रायमाझीको शव दुई दिनपछि उठाइएको छ । विद्यालय प्रशासन र आफन्तबीच मृतकका परिवारलाई ८ लाख रुपैयाँ दिने सहमतिपछि शव राति नै उठाएको काठमाडौं परिसरका निमित्त प्रमुख एसपी दिनेशराज मैनालीले बताए । रमा शनिबार राति झुण्डिएको अवस्थामा मृत फेला परेकी थिइन् ।
शनिबार साँझ स्कुलकै होस्टलमा मृत फेला परेकी रायमाझीको हत्या भएको भन्दै आफन्तले शव उठाउन दिएका थिएनन् । तर प्रहरीले घटनाको सत्यतथ्य अनुसन्धान हुने र पोष्टमार्टमपछि मात्रै प्रारम्भिक कुराहरु खेल्ने भन्दै पोष्टमार्टमका लागि शव उठाउन दिन आग्रह गरेको थियो ।
शनिबार र आइतबार पनि पटक-पटक भएको छलफलमा राति मानवअधिकार आयोगका अधिकारीसहितको छलफलमा सहमति जुटेको हो । शव त्रिवि शिक्षण अस्पताल महाराजगञ्ज लगिएको छ । केएमसी स्कुलको क्यान्टिनमा कार्यरत काभ्रेको तेमाल गाउँपालिका-८, मेच्छेकी २१ वर्षीया रमा रायमाझी शनिबार साँझ होस्टलमै झुन्डिएको अवस्थामा भेटिएकी थिइन् । रमा केएमसी स्कुलमा ५ वर्षदेखि काम गर्दै आएकी थिइन् उक्त दिन घर नफर्किएपछि खोज्दै आफन्त स्कुलमा पुगेका थिए ।
