काठमाडौं–अभिनेत्री नीता ढुंगानाले यही शुक्रबार ज्योतिषी तथा अभिनेता हरिहर अधिकारीसँग विवाह गर्दैछिन् । उनले दरबारमार्गस्थित होटल याक एण्ड यतिमा बिहान १० बजेदेखि सुरु हुने वैवाहिक कार्यक्रममा हरिहरलाई आफ्नो जीवनसाथी बनाउँदैछिन् । नीताले बुधबार सोही होटलमा मेहेन्दी उत्सव गरेकी छन् । जहाँ उनको परिवार, आफन्त तथा फिल्म क्षेत्रका सीमित व्यक्तिको उपस्थिति थियो । उनको उत्सवमा अभिनेत्री रेखा थापा, अनु शाह, पत्रकार प्रकाश सुवेदीलगायतको उपस्थिति थियो । नीताले फेसबुकमार्फत मेहेन्दी उत्सवको तस्वीरहरु सार्वजनिक गरेकी छन् । नीता र हरिहरले चार वर्षको प्रेमलाई विवाहमा पूर्णता दिन लागेका हुन् । विवाहपछि उनले आइतबार सोही होटलमा भव्य पार्टी दिँदैछिन् । उनको पार्टीमा बलिउड अभिनेता तथा ‘गजनी’ फेम्ड भिलेन प्रदीप रावत पनि नेपाल आउने चर्चा छ ।  बिहेलगत्तै हरिहर र नीता दुवै जना निर्माण हुन लागेको फिल्म ‘ह्रस्वदीर्घ’को काममा लाग्नेछन् ।