काठमाडौँ– बिहीबार निधन भएका कान्छा सगरमाथा आरोही शम्भु तामाङको राष्ट्रिय सम्मानका साथ अन्त्येष्टि गर्ने सरकारले निर्णय गरेको छ । आज बसेको मन्त्रिपरिषद बैठकले सो निर्णय गरेको एक मन्त्रीले जानकारी दिए । दुई महिनादेखि क्यान्सर रोगबाट पीडित तामाङको हिजो बिहान क्यान्सर हस्पिटल ललितपुरमा निधन भएको थियो । सिन्धुपाल्चोक घर भएका तामाङले १९७३ मे ५ तारिखका दिन १८ वर्षकै उमेरमा सगरमाथा आरोहण गरी गिनिजबुकमा नाम लेख्न सफल भएका थिए । त्यतिबेला उनको १७ वर्ष ६ महिना १५ दिन उमेर रहेको थियो । यसअघि मन्त्रिपरिषद बैठकले उनको उपचारमा सहयोग गर्ने निर्णय गरेको थियो । हिजो निधन भएपछि राष्ट्रिय सम्मान दिने निर्णय गरिएको हो । तामाङको अन्त्येष्टि सोमबार हुनेछ ।