काठमाडौँ– गोली प्रहारबाट निधन भएका जापानका पूर्वप्रधानमन्त्री सिन्जो आबेको आज राजधानी टोकियोस्थित बौद्ध गुम्बामा अन्तिम संस्कार गरिँदै छ ।
कडा सुरक्षाबीच आबेको अन्तिम संस्कार हुन लागेको जापानी सञ्चारमाध्यमले जनाएका छन् । गत शुक्रबार नारा शहरमा चुनावी प्रचारप्रसार कार्यक्रमलाई सम्बोधन गरिरहेको अवस्थामा उनीमाथि एक व्यक्तिले गोली प्रहार गरेका थिए । गोली प्रहारबाट गम्भीर घाइते भएका आबेको अस्पतालमा उपचारको क्रममा निधन भएको थियो ।
जापानको राष्ट्रिय सञ्चारमाध्यम एनएचकेका अनुसार आक्रमणकारीले हातले बनाएको बन्दुकबाट गोली चलाएका थिए । प्रहरीले शंकास्पद आक्रमणकारीको घरमा छापा मार्दा त्यहाँबाट विस्फोटक पदार्थसमेत बरामद गरेको थियो ।
सोमबार पूर्वप्रधानमन्त्री शिन्जो आबेको परिवार र नजिकका आफन्तहरूले प्रार्थना सभा गरेका थिए । उक्त प्रार्थना सभामा जापानका प्रधानमन्त्री फुमिया किशिदा र अमेरिकी अर्थमन्त्री जेनेट येल्यान्डलगायत करिब साढे दुई हजार मानिस सहभागी थिए ।
आबेलाई पछाडिबाट गोली लागेको थियो । जापान टाइम्सका अनुसार गोलीको टुक्राले आबेको घाँटीमा चोट लागेको थियो र उनको छातीभित्र रगत बगेको थियो।
प्रहरीले घटनास्थलबाट ४१ वर्षीय संदिग्ध आक्रमणकारीलाई पक्राउ गरेको छ । संदिग्ध आक्रमणकारी तेत्सुया यामागामीले सामुद्रिक सेल्फ डिफेन्स फोर्समा समेत काम गरेका थिए ।
