काठमाडौँः सेयर बजारको सुधारको लागि लामो समयदेखि आन्दोलन गर्दै आएको पूँजी बजार सुधार संघर्ष समितिले समेत बुधबार गर्भनर महाप्रसाद अधिकारीको राजीनामा माग गरेका छन् । आज माइतीघरमा प्रदर्शन गर्दैमा उनीहरुले गभर्नर अधिकारीले पूँजी बजार सुधार गर्ने तर्फ कुनै चासो नदेखाएको भन्दै उनको राजीनामा माग गरेका हुन् । त्यसो त, माओवादी (केन्द्र) निकट योङ कम्युनिस्ट लिग (वाइसीएल) र अखिल (क्रान्तिकारी) ले राष्ट्र बैंकका गभर्नर अधिकारीको बर्खास्तीको माग गर्दै प्रदर्शन गरेका थिए । ती संगठनले अपरान्ह ४ बजे माइतीघरमा संयुक्त रुपमा विरोध प्रदर्शन गरेका हुन् । युवा र विद्यार्थी संगठनले अधिकारी नैतिक रुपमा गभर्नरको पदमा बसिरहन नमिल्ने भन्दै बुधरबारदेखि सडक संघर्ष सुरु गरेका हुन् । नेपाल राष्ट्र बैंकका गभर्नर अधिकारी नेकपा एमालेको अर्थ तथा योजना विभाग सदस्य बनेको खुलासा भएसँगै संसद् र सडकमा उनीमाथि छानबिन, राजीनामा र बर्खास्तको माग उठेको हो ।