मुम्बई–बलिउड अभिनेता शाहरुख खानका छोरा आर्यन खानले क्रुज ड्रग्स मामलामा क्लीन चिट पाएका छन् । यसपछि उनले स्पेशल एनडीपीएस कोर्टमा एक निवेदन दिँदै आफ्नो पासपोर्ट फिर्ता गर्न माग गरेका थिए । यो मामलामा बुधबार सुनुवाई गर्दै स्पेशल कोर्टले नारकोटिक्स कन्ट्रोल ब्यूरो(एनसीबी)लाई आर्यनको पासपोर्ट फिर्ता गर्न निर्देशन दिएको छ । आर्यनलाई एनसीबीले क्रुज लागुऔषध मामलामा २६ दिनसम्म हिरासतमा राखेको थियो । आर्यनले गत जून ३० मा आफ्नो वकिलका माध्यमबाट पासपोर्ट फिर्ताको मागसहित निवेदन दिएका थिए । आर्यनले आफूलाई एनसीबीले चार्जशीटमा आरोपी नदेखाएका कारण पासपोर्ट फिर्ता हुनुपर्ने माग राखेका थिए । मुम्बईबाट गोवा गइरहेको क्रुडेलिया क्रुजमा गत वर्षको अक्टोबर २ मा एनसीबीको टिमले छापा मारेको थियो । छापा मार्दा एनसिबीले १३ ग्राम कोकिन, ५ ग्राम मेफेड्रोन, २१ ग्राम मारिजुआना, २२ गोली एमडीएमए र १ दशमलब ३३ लाख रुपैंयाँ नगद बरामद गरेको थियो ।