काठमाडौँ- श्रीलङ्काका पूर्व राष्ट्रपति गोटाबाय राजापाक्ष सिङ्गापुर पुगेका छन् ।
उनलाई नीति भ्रमणका लागि सिङ्गापुर प्रवेश गर्न दिइएको सिङ्गापुरको विदेश मामिला मन्त्रालयले बिहीबार जनाएको छ ।
मन्त्रालयको अनुमतिमा उनी सिङ्गापुर पुगेको मन्त्रालयका प्रवक्ताले पुष्टि गरेका छन् ।
साउदी विमानमार्फत् उनी माल्दिभ्सबाट सिङ्गापुर पुगेको स्थानीय सञ्चार माध्यमहरूले समाचार लेखेका छन् ।
स्थानीय समयअनुसार बिहीबार बेलुका ७:१७ बजे उनी सिङ्गापुरको चाँगी विमानस्थलमा उत्रिएका हुन् ।
राजापाक्ष शरणार्थीको रूपमा आएको हो वा होइन भन्ने बारेमा कुनै जानकारी नभएको पनि मन्त्रालयका अधिकारीहरूले जनाएका छन् ।
उनको गन्तव्य सिङ्गापुर नै हो वा फेरि अन्यत्र जाने हुन् भन्ने बारेमा पनि एकिन नभएको जनाइएको छ ।
आन्दोलनकारीले आफ्नो निवास कब्जा गरेपछि देशभित्रै अन्यत्र लुकेर बसेका राजापाक्षले बुधबार देश छाडेर माल्दिभ्स पुगेका थिए । त्यहाँ उनी एक दिन बसेर सिङ्गापुर पुगेका हुन् ।
उनले देश छोडेपछि राष्ट्रपतिको जिम्मेवारी प्रधानमन्त्री रनिल विक्रमासिङ्घेलाई दिइएको छ ।
सभामुख महिन्दा यापा अबेवार्डेनाले आगामी जुलाई २० मा संसदबाट नयाँ राष्ट्रपति चयन गरिने जानकारी दिएका छन् । (रासस÷सिन्ह्वा)
प्रकाशित मिति: बिहीबार, मंसिर ८, २०७९ १९:२९
प्रतिक्रिया दिनुहोस्
