काठमाडौं—आगामी साउन २० गतेबाट रिलिज हुने फिल्म ‘म’ को दुई सस्पेन्स फ्लेभरका पोस्टर सार्वजनिक भएको छ । पोस्टर कन्तिपुर फिल्म एकेडेमीको फेसबुक पेजमार्फत सार्वजनिक गरिएको हो । सार्वजनिक पोस्टरमा अनुसार नयाँ अनुहार संजोग रसाईलीको वरीपरी कथा र अन्य पात्रहरु घुमेको अनुमान लगाउन सकिन्छ । संजोग फिल्म एकेडेमीका अभिनयका विद्यार्थी हुन् । उनले यसै फिल्ममार्फत अभिनयमा डेब्यू गरेका हुन् । निर्माण टिमले केही दिनअघि १ मिनेटको टिजर सार्वजनिक गरेको थियो । टिजर र पोस्टर अनुसार निशा अधिकारी डक्टर, रुविना थापा नर्स, निराजन प्रधान पुलिस अफिसर, नरेन खड्का ग्याङ्स्टार लुक्समा देखाइएको छ । टिजरमा सरोज खनाल, सविन श्रेष्ठ, सरिता लामिछाने र पुनम श्रेष्ठलाई देखाइए पनि उनीहरुको चरित्र खुलाइएको छैन । फिल्मको निर्देशक सुवर्ण थापा हुन् । उनले बनाएको फिल्म ‘सुनगाभा’ले समीक्षात्मक रुपमा राम्रो प्रतिक्रिया पाएको थियो । उनको नयाँ फिल्म ‘राधा’ आगामी भदौ १० मा रिलिज हुँदैछ । फिल्ममा तेन्जिङ पाल्देनको छायांकन, बनिष शाहको सम्पादन, विमला हुमागाई र पदम पुरीको निर्माण तथा कान्तिपुर फिल्म एकेडेमीका सिइओ प्रकाश पुरीका लेखन तथा क्रिएटिभ प्रोड्युसर छन् । कान्तिपुर सिनेमाजको प्रोडक्सन र कान्तिपुर फिल्म एकेडेमीको प्रस्तुतीमा निर्माण भएको यो फिल्म साउन २० गतेबाट रिलिज हुँदैछ ।