काठमाडौं– ‘आइ लभ यु’, ‘प्रेम पत्र’, ‘डुब्न देउ’, ‘इन्जिन गाडीमा’, ‘प्रेमिका’, ‘मैले जानी सकें’लगायतका दर्जन बढी सुपरहिट गीतका गायक अनिल सिंहले देउडा गीत ‘रेलिमोई’ ल्याएका छन् । आफ्नै म्युजिक च्यानल म्युजिक स्टेटमार्फत उनले गीत ल्याएका हुन् । उनकै संगीत र स्वर रहेको गीतको भिडियोमा उनी नै फिचर्ड छन् । सार्वजनिक गीतमा रिदमराज जोशीको शब्द रहेको छ । ‘सप्तरङ्ग’ नामक सांगीतिक टुरमा रहँदा आफूलाई देउडा गीत गाउने प्रस्ताव आएपछि अनिलले यशराजमार्फत रिदमलाई भेटेका थिए । गीतमा अनिलसँगै इटालियन मोडेल मार्गोस तटेला, निर्मल सिग्देल फिचर्ड छन् । गीतको भिडियोमा सिजिआइ, भिएफएक्स र कलर करेक्सन सुवोध पाण्डेको रहेको छ भने यसलाई म्युजिक स्टेटले छायांकन, सम्पादन र निर्देशन गरेर तयार गरेको हो । अनिलले आफ्नो सफल गीत ‘इञ्जिन गाडीमा २’ र ‘आइ लभ यु २’गीत छिटै दर्शक समक्ष ल्याउदै छन् । उनले आफ्नो हिट गीतहरुको नयाँ सिर्जनालाई ’द ग्रेट हार्मोनिस्ट २’ एल्बममा संग्रहित गर्दैछन् । यसपटक उनले आफ्नै हित एल्बम ’द रियल हार्मोनिस्ट’ कै नाम सापटी लिँदै एल्बम नौ तयार गर्न लागेका हुन् । उनले आफ्नो हिट गीत इञ्जिन गाडीमा र आइ लभ युलाई कन्सर्टमा मात्र प्रस्तुत गर्ने भएका छन् । कन्सर्टमा गीत सुनिएपछि मात्र भिडियो मार्फत गीत सार्वजनिक गरिने छ । ‘इञ्जिन गाडीमा पार्ट २ टुर’ मा उनीसँगै ब्याण्ड समेत रहनेछन् । उनीहरुले उपत्यकाको भिडभाड हुने क्लबहरुमा कन्सर्ट गर्नेछन् । उनको ब्याण्डमा भोकलिस्ट अनिल स्वयम् छन् भने किबोर्डमा सुनिल सिंह, लिड गीतारिस्टमा अनिश मानन्धर, बेस गीतारिस्टमा सन्दीप गुरुङ, ड्रमरमा प्रज्वल निर्वाण रहेका छन् । उनी युरोप र दुबईमा छिटै कन्सर्ट गर्दैछन् भने क्यानडा र अष्ट्रेलियाको लागि पनि तयारी छ । https://www.youtube.com/watch?v=H92H362NQno