काठमाडौँ — राष्ट्रपति विद्यादेवी भण्डारीले भारतको नवनिर्वाचित राष्ट्रपति द्रौपदी मुर्मूलाई बधाई दिएकी छन् । राष्ट्रपति भण्डारीले बिहीबार राति ट्वीट गर्दै मुर्मूलाई बधाई तथा शुभकामना दिएकी हुन् । 'मित्रराष्ट्र गणतन्त्र भारतका पन्ध्रौं राष्ट्रपति निर्वाचित हुनुभएकोमा महामहिम द्रौपदी मुर्मूज्यूलाई म हार्दिक बधाई तथा शुभकामना ज्ञापन गर्न चाहन्छु,' राष्ट्रपति भण्डारीको ट्वीटमा उल्लेख छ । उनले भारतकी राष्ट्रपति मुर्मूको कार्यकालमा दुई देशबीचको सहकार्यले नयाँ उचाइ प्राप्त गर्ने विश्वाससमेत व्यक्त गरेकी छन् । यसैबीच, प्रधानमन्त्री शेरबहादुर देउवाले पनि भारतीय राष्ट्रपति मुर्मूलाई बधाई दिँदै आगामी दिनमा दुई देशबीचको सम्बन्धले थप उचाइ लिने विश्वास व्यक्त गरेका छन् ।