काठमाडौं–अभिनेत्री मेनुका प्रधानले आफ्नो करियरमा झण्डै दुई दर्जन फिल्ममा अभिनय गरेकी छिन् । उनले जति फिल्ममा अभिनय गरेकी छन्, उनको अभिनयमा अब्बलता प्रष्ट देखिन्छ । हरेक फिल्ममा उनले अभिनयको छाप छोड्छिन् । यिनै मेनुकाको अभिनय रहेको फिल्म ‘पानीफोटो’ यही साउन १३ गतेबाट नेपालमा रिलिज हुँदैछ । फिल्ममा उनले सशस्त्र द्वन्द्वमा वेपत्ता भएको छोरालाई पर्खिरहेकी आमाको भूमिकामा अभिनय गरेकी छन् । मेनुकाले आफ्नो परिवार तथा नजिकका आफन्तमा फिल्मको कथाजस्तो अनुभव त गरेकी छैनन् । तर उनले फिल्मका निर्देशक खगेन्द्र लामिछानेबाट धेरै कुरा सिक्न पाएकी छन् । ‘मसँग द्वन्द्वको पीडाको व्यक्तिगत अनुभव त केही पनि छैन । तर, फिल्मको सुटिङअघि र सुटिङ भइरहँदा खगेन्द्र दाईले त्यो कथाहरु भित्री रुपमा महशुस गरोस् भनेर भावुक भएर भन्नुहुन्थ्यो । त्यो कथाले मलाई छुन्थ्यो’,हालैको भेटमा मेनुकाले भनिन्, ‘खगेन्द्र दाईको कुरालाई वास्तविक अर्थमा बुझ्दा निकै मार्मिक रहेछ । मैले वेपत्ता छोराकी आमाको चरित्र निर्वाह गरेकी छु । आमाको त्यो पीडालाई भन्न नसकिने रहेछ । छोरासँगको त्यो मायाले, जिद्धीपनले सधैं तानिरहेको हुँदोरहेछ ।’ ‘पानीफोटो’मा आमाको चरित्रमा अभिनय गरिरहँदा मेनुकाले मायाको अर्थलाई नजिकबाट बुझेकी रहिछन् । ‘छोराप्रति आमाको माया कति शक्तिशाली हुँदो रहेछ भन्ने मैले पानीफोटोबाट थाहा पाएँ । फिल्ममा अभिनय गरिरहँदा माया भन्ने चिज पावरहाउस नै रहेछ भन्ने अनुभव भयो । आमाको महत्व थाहा पाएँ,’ मेनुका भन्छिन् । निर्देशक खगेन्द्रले सन् २०१० मा गुरुकुलमा मञ्चन गरेको नाटक ‘पानीफोटो’मा आधारित रहेर फिल्म बनाएका हुन् । नाटकमा अभिनेत्री अरुणा कार्कीले आमाको भूमिका निर्वाह गरेकी थिइन् । ‘त्यो नाटक हेर्दा अरुणा दिदीको अभिनयबाट प्रभावित थिएँ । मेरो कलिलो दिमागले नाटकको कथा नबुझे पनि अरुणा दिदीको अभिनयले धेरै भावुक भएँ’, मेनुका भन्छिन् । फिल्ममा खगेन्द्र र मेनुका सँगै अनुप बराल, प्रकाश घिमिरे, मलिका महतलगायतका कलाकारको अभिनय छ । https://www.youtube.com/watch?v=1_-0Wiyp_EY