काठमाडौं– अभिनेता सरोज खनाल र कलाकार शिशिर भण्डारी अभिनित म्युजिक भिडियो ‘बुबाः एक कथा’ रिलिज भएको छ । शनिवार काठमाडौंमा आयोजित नारायण बल्लभ फाउन्डेशनको घोषणा समारोहबीच यस गीतको भिडियो रिलीज गरिएको हो । गीतमा ‘नारायण बल्लभ फाउन्डेशन’का अध्यक्ष नरेन्द्र बल्लभ पन्तको गीत, संगीत तथा स्वर रहेको छ । सुव्रत आचार्यको निर्देशनमा बनेको यस भिडियोमा खनाल र भण्डारीको साथमा एलिश खनाल, गीता थापा, बालकलाकार दियान गौतम, रोमन दंगाल लगायतको अभिनय रहेको छ । यो गीत नारायण बल्लभ पन्त प्रतिष्ठानले निर्माण गरेको हो । गीतकार, संगीतकार तथा गायक नरेन्द्रले पिताको निधन भएको एक वर्षपछि पिताकै सम्झना र समर्पणस्वरुप यो गीत लेखेको बताए । अभिनेता सरोज खनालले स्व. पन्तको भुमिकामा अभिनय गर्दा आफुलाई अत्यन्तै खुशी लागेको बताए । खनालले कमै मात्रामा वास्तविक पात्रहरुमा अभिनय गर्न पाइने बताउँदै यस प्रकारको अभिनय सबैभन्दा गाह्रो रहेको रहेको जिकिर गरे । निर्देशक आचार्यले वास्तविक कथामा काम गर्नु आफैमा चुनौती रहेको बताए । नेपालको कानून तथा न्यायको क्षेत्रमा योगदान दिई वरिष्ठ अधिवक्ताको रुपमा सम्मानित स्व. नारायण बल्लभ पन्तको स्मृतिमा शुरु भएको ‘नारायण बल्लभ पन्त प्रतिष्ठान’को पूर्व उद्योग, वाणिज्य तथा आपुर्ति राज्यमन्त्री तथा अन्तराष्ट्रिय चेम्बर अफ कमर्श नेपालका अध्यक्ष डा. राजेश काजी श्रेष्ठले शुभारम्भ गरे । विभिन्न सामाजिक कार्य गर्ने उद्देश्यले शुरु भएको फाउन्डेशन उद्घाटनमा आर्थिक समस्याको कारण स्नातक तहको अध्ययनमा समस्या झेलिरहेकी सम्पन्नता विन्दुकारलाई ५१ हजार रुपैंयाँ प्रदान गरिएको थियो । हालको लागि फाउण्डेसनले १० लाख रुपैंयाँ बराबरको अक्षयकोष सुरु गरेको छ । https://www.youtube.com/watch?v=sL_mqnGdA8Q