काठमाडौं–निर्देशक कमल एक्चै मगरको निर्देशनमा बनेको फिल्म ‘डेसान’ ले सोमबार फस्टलुकसँगै प्रदर्शन मिति सार्वजनिक गरेको छ । महामारीको विषयमा निर्माण गरिएको फिल्म २३ मंसिरमा प्रदर्शन हुनेछ । सार्वजनिक दुई फस्टलुकमध्ये एउटा पोस्टरमा डेब्यु अभिनेत्री पुनम थापा र डेब्यु अभिनेता निशान चौहान रोमान्टिक अवतारमा देखिएका छन् भने अर्काे पोस्टरमा निशान र पुनमका साथमा नम्रता सापकोटा र भोला सापकोटालाई गम्भीर मुद्रामा प्रस्तुत गरिएको छ । पर्फमिङ आर्ट क्रिएसनको ब्यानरमा निर्मित फिल्ममा नम्रता, निशान, भोलाराज, पुनमका साथमा कविता आले, आरुषजंग सारु, मलिका बस्नेत, प्रमीशा सारुमगरलगायतका कलाकारको अभिनय छ । चक्रबहादुर महर्जनको छायांकन रहेको फिल्मको गीत राजु थापाले लेखेका हुन् भने हरि लम्सालको संगीत, प्रताप दास र प्रविशा अधिकारीको स्वर छ । मिलन श्रेष्ठको सम्पादन रहेको फिल्म एफडी, जिजिए ग्रुप र रिच इन्टरटेन्मेन्टले वितरण गर्दैछ । राज थापा काउचाको कथा रहेको फिल्मको स्क्रिप्ट निर्देशक कमल स्वयम्ले लेखेका हुन् । कृशाला मगर कार्यकारी निर्माता रहेको फिल्म नेपालभन्दा पहिला विभिन्न देशमा प्रदर्शन हुने तयारीमा छ ।