काठमाडौं–अभिनेता प्रदीप खड्का यतिबेला दुई फिल्म ‘प्रकाश’ र ‘प्रेमगीत ३’का कारण चर्चामा छन् । एक महिनाको अन्तरमा रिलिज हुने यो फिल्ममा प्रदीपलाई दर्शकले फरक गेटअपमा हेर्न पाउनेछन् । दिनेश राउत निर्देशित ‘प्रकाश’मा प्रदीप शिक्षक बन्न संघर्षरत जुम्ली युवाको भूमिकामा छन् । सन्तोष सेन र दिवंगत छेतेन गुरुङको संयुक्त निर्देशन रहेको फिल्म ‘प्रेमगीत ३’मा प्रदीप शाही लुक्समा छन् । ‘प्रकाश’ भदौ १० र ‘प्रेमगीत ३’ असोज ७ गते रिलिज हुँदैछ । फिल्म रिलिज नजिकिँदै गएपछि प्रदीपप्रति फ्यानको क्रेज बढ्दो छ । प्रदीपका एक फ्यान विजय भट्टले प्रदीपको लामो कपालयुक्त अनुहारको ट्याटु खोपेर इन्स्टाग्राममा राखेका छन् । उनले आफ्नो हातमा ट्याटु खोपेका हुन् । विजयले इन्स्टाग्राममा ‘फाइनल्ली फेभरेट दादाको पिक्चरको ट्याटु बनाइयो’ भन्दै क्याप्सन लेखेका छन् । उनले ट्याटु बनाउँदाको भिडियो पनि शेयर गरेका छन् । त्यस्तै शिल्पा तामाङ नाम गरेकी एक फ्यानले पनि प्रदीपको नाम लेखिएको ट्याटु बनाएकी छन् । ‘तिम्रो नामको ट्याटु खोपेर तिमीलाई चाहने मै मात्र छु भनेर साबित गर्न खोजेकी होइन...तिमीलाई चाहनेहरु धेरै छन्, म पनि तीमध्ये एक हुँ...तिमी र तिम्रो कामलाई माया गर्छु...एज ए वेल विसर, एज ए फ्यान एण्ड एज ए लभर मैले ट्याटु हानें...सायद कसैलाई असर नपर्ला’, उनले लेखेकी छन् । प्रदीपको यो क्रेज हेर्दा उनले लामो समयसम्म नेपाली फिल्म क्षेत्रमा राज गर्नेछन् भन्ने कुरामा दुईमत छैन । https://www.facebook.com/pradeepkhadkaofficial/videos/777517553278192/