काठमाडौं–भारतले नेपाली चियामा प्रतिबन्ध लगाउन तयारी गरेपछि नेपालको चिया उद्योगीहरुले आपत्ति जनाएका छन् । नेपाली चियाको प्रमुख बजार भारत भएको हुँदा हाल नेपालबाट ९५ प्रतिशत चिया भारतीय बजारमा शतप्रतिशत छुटका साथ निर्यात हुँदै आइरहेको छ ।
तर भारतले हाल कुनै जानकारी नदिई भारतीय चिया निकायले वाणिज्य सन्धि विपरित नेपाली चिया गुणस्तरहीन भएको र न्यून मूल्यको चिया मात्रै भारतीय बजार आइपुग्ने गरेको भन्दै नेपालको चियालाई करको दायरामा ल्याउने प्रस्ताव प्रति ध्यानाकर्षण भएको चिया उद्योगीहरुले बताएका छन् ।
रिपोर्टस क्लबमा बिहीबार आयोजित पत्रकार सम्मेलनमा सुर्योदय टि प्रोड्युसर्स एशोसिएसनका कोषध्यक्ष महेश अर्यलले भारतले नेपाली चियाको विषयमा लगाएको आरोप गलत रहेको बताए । उनका अनुसार नेपालको चिया भारतलगायत विश्वका अन्य विभिन्न मुलुमा समेत पठाउने गरेको तर हालसम्म गुणस्तरणमा प्रश्न नउठाएकोमा आफुहरुको गम्भिर आपत्ति रहेको बताए ।
त्यस्तै भारतको यस प्रकारको कदमले नेपाल र भारत बिचको सम्बन्धमा थप दरार आउन सक्ने समेत उनले दाबी गरेका छन् ।
हाल नेपालमा वर्षेनी करिब ३ करोड ६० लाख केजी हरियो पत्ति उत्पादन हुँदै आएको छ । घरेलु तथा साना, मझौला र ठुला गरी हाल १५० भन्दा बढि उद्योगहरु सञ्चालनमा रहेका छन् । जसबाट प्रत्यक्ष रुपमा ८० हजार र अप्रत्यक्ष रुपमा १ लाखको हाराहारीमा मानिसहरुले रोजगार पाइरहेका छन् ।
त्यसकारण हाल चिया उद्योग र उद्योगीको लागी मात्र नभएर त्यहाँ कार्यरत कामदार र त्यसबाट सरकारलाई हुने फाइदालाई समेत मध्यनजर गर्दै सरकारले जति सक्दो चाँडो यस समस्याको समाधानतर्फ ध्यान दिनुपर्ने उनीहरुको भाग रहेको छ ।
नेपाली चिया आयातलाई सुरूमा प्रतिबन्ध लगाउने प्रस्ताव अहिले भारतीय संसदका दुवै सदनमा पुगेको छ । राज्यसभा र लोकसभामा पुगेको उक्त प्रस्ताव पारित भए नेपाली चियाले आफ्नो मुख्य अन्तर्राष्ट्रिय बजार गुमाउने निश्चित छ ।
भारतीय संसदको राज्यसभा अन्तर्गतको ‘डिपार्टमेन्ट रिलेटेड स्ट्यान्डिङ कमिटी अन कमर्स’ ले तयार पारेको प्रतिवेदनको १७१ नम्बर बुँदामा नेपाली चियालाई आयात प्रतिबन्ध लगाउने कुरा उल्लेख छ ।
प्रकाशित मिति: बिहीबार, मंसिर ८, २०७९ ०७:४१
प्रतिक्रिया दिनुहोस्
