काठमाडौं–अभिनेता आर्यन सिग्देल अनुबन्धित भएको नयाँ फिल्मलाई बलिउडका निर्देशक विशाल देसाई निर्देशन गर्ने भएका छन् । निर्माता रघु परियार र बलिउड निर्देशक विशाल बीच आज सम्झौता भएको छ । मुम्बईमा आज दुई बीच नेपाली फिल्म ’सायरा’मा सहकार्य गर्ने सम्झौता भएको हो । निर्माण कम्पनी डि.बि.आर. मिडिया एण्ड मुभिजको तर्फबाट सम्झौता गर्दै निर्माता रघुले आउँदो दसैँ ताका फिल्म छायांकन हुने बताए । ’हाम्रो फिल्म गर्न उहाँ तयार हुनु भयो । बलिउडको उहाँको अनुभवले नेपाली फिल्मको मेकिङ उत्कृष्ट हुने विश्वास छ । उहाँले हामीलाई गर्नुको ट्रष्टले निकै खुसी मिलेको छ’ मुम्बईमा रहेका निर्माता रघुले भने । निर्देशक देसाईले पनि नेपाली फिल्म गर्न पाउँदा उत्साहित भएको बताए । ’नेपाल र भारतको सम्बन्ध निकै प्रगाढ छ । सांस्कृतिक दृष्टिकोणले पनि हामी नजिक छौं । नेपाली फिल्मको अफर आएकोले यसपटक गर्न रेडी भएको हुँ’ निर्देशक देसाईले भने । उनी अहिलेसम्म नेपाल नआएता पनि नेपाली जीवनशैलीसँग परिचित रहेको प्रतिक्रिया दिए । निर्देशक देसाईले ‘वीरगति’ र ‘ढोलकी’ नामक फिल्म निर्देशन गरिसकेका छन् । यस्तै उनले ’कामिनी दामिनी’ नामका टिभी सिरियल समेत निर्देशन गरेका छन् । उनले ‘अमर प्रेम’मार्फत अभिनय यात्रा सन् १९७२ मा सुरु गरेका थिए । फिल्मको ९० प्रतिशत छायांकन अष्ट्रेलिया र १० प्रतिशत नेपालमा हुनेछ ।