बर्दिबास– महोत्तरीको बर्दिबासस्थित यातायात व्यवस्था सेवा कार्यालयले सवारी चालक अनुमति पत्र परीक्षा सञ्चालन कार्यविधि निर्देशिका, २०७७ लागू गरेको छ ।
मधेस प्रदेश सरकार भौतिक पूर्वाधार विकास मन्त्रालयले परिपत्र गरेपछि यातायात व्यवस्था सेवा कार्यालय बर्दिबासले निर्देशिका लागू गरेको हो ।
भदौ १ गतेदेखि उक्त निर्देशिका कार्यान्वयनमा ल्याएको यातायात व्यवस्था सेवा कार्यालय बर्दिबासका प्रमुख पोषण थापाले जानकारी दिनुभयो । ट्रायल परीक्षामा अब ७० नम्बर ल्याए पास हुने उहाँले बताउनुभयो ।
“पहिला सामान्य सामान्य त्रुटि हुँदा पनि फेल गरिन्थ्यो । अब केही अवसर मिलेको छ । त्यस्तो सानातिना कुराबाट सेवाग्राही मुक्ति पाएका छन् । अहिले सबै सेवाग्राही सन्तुष्ट हुनुहुन्छ”, प्रमुख थापाले भन्नुभयो ।
नयाँ निर्देशिका लागू भएपछि ८० नम्बर ल्याएर उत्तीर्ण हुनुभएका सर्लाही हरिवनका सुलभ सिंह भन्नुहुन्छ, “धन्न ७० प्रतिशतको व्यवस्थाले लागू भएछ र पास भए ।”
हरिवनकै स्वेक्षा निरौलाले ७० प्रतिशत ल्याएर उत्तीर्ण हुने प्रावधानले परीक्षार्थीमा गर्न सक्छु भन्ने हौसला पलाएको बताउनुभयो ।
“यो व्यवस्थाले सेवाग्राहीमा हौसला बढेको छ । यसले गर्दा अब बढीको सङ्ख्यामा ट्रायल पास हुन्छ कि जस्तो लागेको छ”, उहाँले भन्नुभयो ।
सवारी चालक अनुमति पत्र परीक्षा सञ्चालन कार्यविधि निर्देशिका, २०७७ कार्यान्वयनमा आएपछि ट्रायल परीक्षा विगतभन्दा लचिलो भएको जिल्ला ट्राफिक प्रहरी कार्यालय बर्दिबास महोत्तरीका प्रहरी निरीक्षक उदय सिंह सिद्धपतिले बताउनुभयो । यो व्यवस्थाले सेवाग्राहीलाई केही सहज हुने उहाँको बुझाई छ ।
साउन ३० गते भौतिक पूर्वाधार विकास मन्त्रालय मधेस प्रदेश सरकारले बर्दिबास यातायात कार्यालयलाई भदौ ७ गतेसम्म उक्त निर्देशिका लागू गर्न परिपत्र गरेको थियो । तर, परिपत्र गरे लगत्तै समयावधिको सुरुमै यातायात व्यवस्था सेवा कार्यालय बर्दिबासले भदौ १ गते देखिनै निर्देशिका लागू गरेको छ ।
प्रकाशित मिति: बिहीबार, मंसिर ८, २०७९ १२:३६
प्रतिक्रिया दिनुहोस्
