जनकपुरधाम– अगामी सेप्टेम्बर २२ तारिखबाट काठमाडौँमा हुने नेपाल प्रीमियर लिगमा जनकपुर रोयाल्स टिम सहभागी हुने भएको छ ।
नेपाल क्रिकेट सङ्घको आयोजनामा हुने प्रतियोगितामा नेपालसहित विश्वका अन्य देशका खेलाडी सहभागी हुने लिगका लागि ४ वटा टिमको छनौट भइसकेको छ ।
प्रतियोगिताका लागि अझै दुई वटा टिम छनौट हुन बाँकी रहेको लिगको प्रायोजन गर्ने गोल्ड स्पोर्टस् प्रालिका निर्देशक गौरीशङ्कर थमानीले जनकपुरधाममा आयोजित पत्रकार सम्मेलनमा जानकारी दिए ।
कूल १ सय १० जना खेलाडी रहने प्रतियोगितामा जनकपुर रोयाल्स टिमले भाग लिँदा जनकपुरधामको पर्यटन प्रवर्द्धनमा ठूलो मद्दत पुग्ने विश्वास नेपाल क्रिकेट संघका प्रदेश अध्यक्ष हिरा भगतको छ ।
प्रतियोगितामा जनकपुरधामको कला संस्कृतिको प्रचारप्रसार हुने भएकाले पर्यटन प्रवर्द्धनमा ठूलो टेवा पुग्ने संघका धनुषा जिल्ला अध्यक्ष एवं राष्ट्रिय खेलाडी शोभाकान्त पाण्डेले बताए ।
प्रीमियर लिगका लागि छनौट हुने खेलाडीको खेलकुदको अभ्यास काठमाडौँमै हुने नेपाल क्रिकेट संघ, धनुषाका सचिव आशिष झाले जानकारी दिए ।
प्रकाशित मिति: शुक्रबार, मंसिर ९, २०७९ ०१:०२
प्रतिक्रिया दिनुहोस्
