काठमाडौ–शुक्रबारबाट प्रदर्शनमा आएको फिल्म ‘प्रकाश’का अभिनेता प्रदीप खड्काले आफ्नो फिल्मलाई हलवालाले विभेदा गरेको भन्दै आक्रोश पोखेका छन् । शुक्रबार काठमाडौंमा आयोजित आकस्मिक पत्रकार सम्मेलनमा उनले फिल्म प्रदर्शन खुला प्रतियोगिता भएकोले कसैको फिल्मको बाहिरी मुहार हेरेर त्यसमाथि ट्याग लगाउन नमिल्ने बताए । ‘हाम्रो फिल्मको आउटलुक हेर्दा आम मानिसलाई कभर गर्न नसक्ला भनेर आकलन गरे पनि कसैले फिल्म झुर छ, राम्रो छैन भनेर ट्यागै त लगाउन भएन नि’, उनले भने, ‘वितरकले फिल्म नहेरी प्रदर्शनमा रोक लगाउन खोजेका छन् । तर फिल्म हेर्ने दर्शकले राम्रो प्रतिक्रिया दिइरहेका छन् । हाम्रो फिल्मलाई कम शो दिइएको छ । यसमा हलवालाको नियतमा खोट देखें ।’ उनले प्रकाशलाई पर्याप्त शो नदिइए र यस्तै समस्या भइरहे चोक–चोकमा प्रोजेक्टर लगाएर भए पनि फिल्म देखाउने चेतावनी दिए । ‘फिल्म चलेन भनेमात्र अर्को फिल्म दिनुपर्छ, फिल्मको रेस्पोन्स नै नहेरी र विश्लेषण नै नगरी यस्तो गर्नुमा मैले चाहिँ कहीँ न कहीँ नियतमै खोट देखेको छु,’ उनले भने । निर्माता महेन्द्र अधिकारीले आफ्नो फिल्म दर्शकको लागि बनाइएको भन्दै दर्शकले चाहेको कुनै पनि समयमा फिल्म हेर्न पाउनुपर्नेमा वितरकले ध्यान दिनुपर्ने जोड दिए । ‘१२ बजे, १ बजे, त्यो भन्दा बढी शो नै छैन। एउटा क्युएफएक्समा ३ वटा हल हुन्छ। त्यसमा एउटा शो त हामीलाई आउनुपर्यो नि,’ उनले भने ।