काबुल– तीन सय २४ जना अफगान शरणार्थी बोकेको एउटा विमान क्यानडाको मनिटोवा प्रान्तको राजधानी विनिपेगमा अवतरण गरेको छ ।
तालिवान सरकार सत्तामा आएपछि करिब ४० हजार अफगान नागरिकलाई क्यानडा सरकारले पुनर्वासको व्यवस्था गर्ने प्रतिबद्धता व्यक्त गरेअनुरूप उनीहरू विनिपेग पुगेका हुन् । विमानमा क्यानडाली सेना र सहयोगी संस्थासँग काम गरेका दोभाषेलगायत रहेका खामा प्रेसले जनाएको छ ।
खामा प्रेसकाअनुसार हालसम्म १७ हजार छ सय ५५ जना अफगान नागरिकलाई क्यानडामा बसोबासको प्रबन्ध भइसकेको छ । मानवीय सहायता कार्यक्रमअन्तर्गत उनीहरूलाई स्थायी बसोबासको व्यवस्था गरिएको हो । अफगानीहरूलाई क्यानडा स्थानान्तरणको प्रयास जारी रहेको छ ।
गत वर्ष तालिबानले अफगानिस्तानको सत्ता कब्जा गरेपछि त्यहाँ अकल्पनीय मानवीय सङ्कट उत्पन्न भयो जसका कारण अन्तर्राष्ट्रिय समुदाय एवम् विकसित देशले सहयोगी हात फैलाए । लाखौँ महिला र बालिका आधारभूत अधिकारबाट वञ्चित हुनुपरेको छ भने पोशाकलगायत धेरै अमानवीय प्रतिबन्ध झेल्न विवश पारिएका छन् ।
सार्वजनिक स्थलमा अनुहार छोप्नैपर्ने, एक्लै यात्रा गर्न नपाइनेजस्ता धेरै अव्यवहारिक एवम् अमानवीय उर्दी तालिबानले महिलाहरूमाथि जारी गरेको छ । महिलाले स्मार्टफोनसमेत प्रयोग गर्न नपाउने निरङ्कुश आदेश उसले जारी गरेको छ ।
तालिबानका कारण सञ्चारमाध्यममा कार्यरत ८० प्रतिशत महिलाले रोजगारी गुमाएका तथा देशका करिब एक करोड ८० लाख महिला स्वास्थ्य, शिक्षा र सामाजिक अधिकारका निम्ति सङ्घर्ष गरिरहेका छन् । सत्ता कब्जा गरेपछि तालिबानले पत्रकार सम्मेलन गरेर समावेशी समाज र समानता प्रवर्द्धनको प्रतिबद्धता जनाए तापनि त्यो पालना भएको छैन । रासस
प्रकाशित मिति: बिहीबार, मंसिर ८, २०७९ ००:५४
प्रतिक्रिया दिनुहोस्
