एसियाली विकास बैंकले पाकिस्तानलाई ३० लाख अमेरिकी डलर अनुदान स्वीकृत गरेको छ । पाकिस्तानमा आएको विनाशकारी बाढीको बीचमा, एसियाली विकास बैंक (एडीबी) ले बुधबार पाकिस्तानको आपतकालीन राहत प्रयासहरूलाई सहयोग गर्न ३० लाख अमेरिकी डलर अनुदान स्वीकृत गरेको एएनआई न्युजले जनाएको छ ।
एडीबीको प्रेस विज्ञप्तीका अनुसार एसिया प्यासिफिक डिजास्टर रेस्पोन्स फण्ड (एपीडीआरएफ) बाट प्राप्त भएको उक्त अनुदानले देशभरका बाढीपीडितलाई सहयोग गर्न खाद्यान्न आपूर्ति, टेन्ट र अन्य राहत सामग्री तत्काल खरिद गर्न सहयोग गर्ने उल्लेख छ । यता, विश्व स्वास्थ्य संगठन (डब्ल्यूएचओ) का अनुसार पाकिस्तानमा ६४ लाख भन्दा बढी मानिसहरूलाई मानवीय सहायताको खाँचो छ ।
बाढीबाट ३ करोड भन्दा बढी मानिसहरू प्रभावित भएको अनुमान गरिएको छ, जसमा १ हजार भन्दा बढीको मृत्यु र १५ सय घाइते भएका छन् । विज्ञप्ति अनुसार हाल करिब ५० हजार मानिस राहत शिविरमा छन् ।
भारी वर्षाका कारण पाकिस्तानभर बाढी, पहिरो र हिमताल विस्फोट भएको छ । जुलाईमा, देशमा औसत वार्षिक मनसुनको ६० प्रतिशतभन्दा बढी वर्षा मात्र तीन हप्तामा भएको थियो ।
