‘प्रदेश सरकारका योजना विवरण प्रजिअलाई जानकारी गराइन्छ’

हेटौँडा– बागमती प्रदेशका मुख्यमन्त्री राजेन्द्रप्रसाद पाण्डेले प्रदेशका १३ वटै जिल्लाका प्रमुख जिल्ला अधिकारी (प्रजिअ) लाई प्रदेश सरकारको योजनाको विवरण जानकारी गराइने बताएका छन् । मुख्यमन्त्री कार्यालयमा प्रजिअहरु सँगको छलफलका क्रममा उनले स्थानीयवासीलाई विपद् आइपर्ने बित्तिकै पहिला जाने स्थान जिल्ला प्रशासन कार्यालय रहेकाले पनि समन्वय र सहकार्य गरिने बताए । बजार व्यवस्थापन, विपद् व्यवस्थापन, क्रसर सञ्चालनका मापदण्ड लगायतका विषयमा समन्वयको कमी देखिएको बताउँदै उनले अबका दिनमा समन्वय गरेर कार्यसम्पादन हुने जनाए । प्रजिअहरुले सङ्घ, प्रदेश र स्थानीय सरकारबीचको समन्वयको कमीलाई विशेष चासो राखेको र अहिलेको समस्या पनि यही रहेकाले यसमा प्रदेश सरकारले ध्यान दिने उनको भनाइ थियो । प्रदेश सरकारले सुधार गृह, ज्येष्ठ नागरिक भवन लगायत निर्माण कार्यमा जोड दिने उनले बताए । सबै जिल्लामा निर्माण भएका र निर्माणाधीन रहेका प्रादेशिक अस्पतालका बारेमा पनि उनले जानकारी लिए । साथै प्रजिअहरुबाट उठेका विषय सिधा जनतासँग जोडिएकाले प्रदेश सरकारको ध्यानाकर्षण भएको समेत मुख्यमन्त्री पाण्डेले बताए । भक्तपुरका प्रजिअ रुद्रादेवी शर्माले बाल सुधार गृह क्षमताभन्दा बढी सञ्चालन भएको भन्दै बालबालिकाका लागि शिक्षा, स्वास्थ्य र खानपानको समेत उचित व्यवस्थापनमा पहल गरिदिन मुख्यमन्त्री पाण्डेसँग माग गरे । उनले सङ्घ, प्रदेश र स्थानीय तहबीच समन्वयको कमी भएको बताए । धादिङका प्रजिअ कृष्णप्रसाद लम्सालले क्रसरसम्बन्धी मापदण्डको विषयमा सङ्घ, प्रदेश र स्थानीय तहमा कसको क्षेत्राधिकार भनेर किटान गरिनुपर्ने बताए । उनले यसको व्यवस्थापनका लागि ठोस एकीकृत नीति, नियमन प्रणालीको आवश्यकता र ठोस कानून चाहिएको बताए ।