जीवनयापन

ज्येष्ठ नागरिकका विभिन्न पक्षको चित्रण गरिएको पुस्तक ‘पाका मान्छेका कुरा’

सिएन नेपाल

बिहीबार, मंसिर १, २०७९

ज्येष्ठ नागरिकका विभिन्न पक्षको चित्रण गरिएको पुस्तक ‘पाका मान्छेका कुरा’

काठमाडौँ– प्राडा मुकेशकुमार चालिसेद्वारा लिखित ‘पाका मान्छेका कुरा’ ज्येष्ठ नागरिकका बारेमा लेखिएको पुस्तक सार्वजनिक भएको छ । यो पुस्तक एक कार्यक्रमका बीच अग्रज व्यक्तित्व वरिष्ठ पत्रकार भैरव रिसाल तथा कृष्ण मुरारी गौतम लगायत दश पाका मान्छेद्वारा रसियन कल्चर सेन्टर काठमाडौंमा लोकार्पण गरियो । पाका मान्छेहरूका बीच सम्पन्न उक्त कार्यक्रममा ज्येष्ठ नागरिक अथवा खारिएका मान्छेका विभिन्न पक्षको चित्रण गरिएको यस पुस्तकका बारेमा एजिङ नेपालका अध्यक्ष कृष्णमुरारी गौतमले ज्येष्ठ नागरिक ऐन र त्यसले संरक्षण गरेको पक्षको तुलनात्मक कुराको व्याख्या गरे । पाका मान्छेका कुराको पुस्तकका आन्तरिक पक्षको कुरा गर्दै फित्कौली डटकमका सम्पादक तथा हास्यव्यङ्ग्यकार नरनाथ लुइँटेलले कृतिमा ज्येष्ठ नागरिकका विभिन्न पक्षको सबल चित्रण गरिएको कुरा गरे । ज्येष्ठ नागरिक आन्दोलनका अगुवा सिताराम ढकालको प्रसङ्ग उद्धृत गर्दै डिआजी भीम ढकालले ज्येष्ठ नागरिकका हक र हितका कुरामा गरिएका आन्दोलनको चर्चा गरे । बाआमाका सधैँ राम्रो हेरविचार गर्नुपर्छ भन्ने विचार व्यक्त गरे । आफ्ना हजुरबा र हजुरआमाको प्रेरणा र हेरविचारबाट कानुनको अध्ययन गरी अधिवक्ता बनेका प्रज्वलराज ज्ञवालीले हजुरआमाको जीवनवृत्त समेटेर नलिनी नामक पुस्तक लेखेको चर्चा गरे । अग्रजका बारेमा मिठासपूर्ण कविता वाचन गर्दै वरिष्ठ कवि रमेश खकुरेलले वृद्धावस्थाकाे चर्चा गरे । पुस्तकका लेखक प्राडा मुकेशकुमार चालिसेले वृद्ध मानिसका सबै पक्षका चित्रणका साथै आनीबानी र व्यवहारका कुरालाई पुस्तकमा समेटिएको कुरा उल्लेख गरे । पाका मान्छेका कुराले वृद्धाका हक हित र नागरिक अधिकारको संरक्षणको आवाज उठाएको र अस्पताललगायत अन्य क्षेत्रमा ज्येष्ठ नागरिकको उपचार र संरक्षणमा काम गर्नुपर्ने कुरा बताए । कार्यक्रमका प्रमुख अतिथि वरिष्ठ पत्रकार तथा साहित्यकार भैरव रिसालले वृद्धावस्थाका समस्या र परिवारले गर्ने सहयोग र माया पाउन सरल बनिदिनु पर्ने प्रसङ्गको चर्चा गरे ।

प्रकाशित मिति: बिहीबार, मंसिर १, २०७९

प्रतिक्रिया दिनुहोस्