काठमाडौँ– गीतकार युवराज भण्डारीले नेपाली सङ्गीत क्षेत्रमा एउटा अर्को सुमधुर प्रेम गीत लिएर आएका छन्। गायक प्रविण बेडवाल र गायिका रचना रिमालको स्वर रहेको तिम्रो आँखामा बोलको युगल गीत हालै वाई बी क्रियशन मार्फत सार्वजनिक भएको छ। सङ्गीतकार राजेश थापाको सङ्गीत र गीतकार युवराज भण्डारीको शब्द रहेको उक्त गीतमा फणीन्द्र राईले सङ्गीत संयोजन गरेका छन् । काठमाडौँको ए–वान म्युजिसियन स्टुडियोमा रेकर्ड गरिएको उक्त गीतको रेकर्डिङ राजेश श्रेष्ठले गरेका हुन् भने ध्वनि सम्पादन किशोर थापाले गरेका छन्। वाई बी क्रियशनले हालै सार्वजनिक गरेको यस गीतको भिडियोमा गायक गायिका र वाधवादकहरूको अभिनय देख्न सकिन्छ । बिनोद बमको निर्देशन र सम्पादन र केशव अधिकारी छायाङ्कनमा भिडिओ सांग्रिला क्रियशनले तयार पारेको हो। गीत, गजल र अन्य विधामा तिन दशकदेखि सक्रिय डुम्रीबेँसी, तनहुँ निवासी युवराज भण्डारी हाल क्यानडा छन्। भण्डारीको एक गीति कविता सङ्ग्रह प्रकाशित छ भने उनको शब्द र सङ्गीतमा केही गीतहरू रेकर्ड भइसकेका छन्। पेशाले इन्जिनियर भण्डारी प्रवासमा साहित्यिक र सामाजिक अभियानमा सक्रिय छन्। नेपाली सङ्गीत उद्योगमाुतिम्रो आँखामा एक सशक्त र सुन्दर प्रेम गीतको रूपमा आएको छ। यस गीतले दर्शक श्रोताहरूको मन जित्ने विश्वास गरिएको छ।