काठमाडौंं गण्डकी प्रदेशमा हुने नवौं राष्ट्रिय खेलकुद प्रतियोगिताको रनिङ ट्रफी सुदूरपश्चिम प्रदेशको धनगढी रंगशालामा शनिबार प्रदर्शन गरिएको छ । बृहत राष्ट्रिय खेलकुदका लागि पहिलो पटक रनिङ ट्रफी निर्माण गरिएको हो । ट्रफीलाई अन्य पाँच प्रदेश, नेपाली सेना, नेपाल प्रहरी र एपीएफको मुख्यालयमा प्रदर्शनका लागि राखिनेछ भने त्यसपछि नवौं राष्ट्रिय खेलकुदको मुख्य आयोजना स्थल पोखरा पु¥याइने छ । ट्रफी आइतबार लुम्बिनी प्रदेशको एन्फा टेक्निकल सेन्टर र गौतमबुद्धको जन्मस्थल मायादेवी मन्दिरमा प्रदर्शनमा राखिनेछ । यस्तै सोमबार बागमती प्रदेशको हेटौडा, असोज ७ गते नेपाली सेना मुख्यालय जंगी अड्डा, असोज ८ गते प्रदेश १ को राजधानी विराटनगर, असोज ९ गते नेपाल प्रहरीको मुख्यालय नक्साल र सशस्त्र प्रहरीको मुख्यालय हलचोक पु¥याइने छ । यस्तै असोज ११ गते कर्णालीको सुर्खेत, असोज १३ गते मधेश प्रदेशको रामजानकी मन्दिर र असोज २३ गते गण्डकी प्रदेशको पोखरा प¥ुयाइने छ । ओलम्पियन दीपक विष्टको संयोजकत्वमा रनिङ ट्रफी टुर कार्यदल गठन गरिएको छ । कार्यदलका सदस्यहरूमा पारस खड्का, दीपक श्रेष्ठ, मीरा राई र अरुणा शाही छन् । राष्ट्रिय खेलकुद परिषद्का संरक्षक तथा प्रधानमन्त्री शेरबहादुर देउवाले नवौं राष्ट्रिय खेलकुद प्रतियोगिताको ट्रफी शुक्रबार सार्वजनिक गरेका थिए । करिब १० लाख रुपैयाँ खर्च गरेर राष्ट्रिय खेलकुदको रनिङ ट्रफी बनाइएको हो । लगातार तीन संस्करणमा शीर्ष स्थानमा रहने टोलीले यो ट्रफी आफूसँग राख्न पाउनेछन् । नवौं राष्ट्रिय खेलकुद असोज २८ देखि कात्तिक ३ गतेसम्म गण्डकी प्रदेशमा आयोजना हुँदैछ । प्रतियोगितामा सात प्रदेश, तीन विभाग र एक एनआरएनए गरी ११ टोलीले सहभागिता जनाउनेछन् ।