काठमाडौँ– चिकित्सा शिक्षा क्षेत्र सुधारका अभियान्ता डा. गोविन्द केसीका प्रतिनिधि र सरकारी टोलीबीच भएको वार्ता निष्कर्षविहीन बनेको छ ।
आज भएको वार्तामा दुवै पक्षको सहमति हुन सक्ने सम्भावना भएका बुँदाहरुको बारेमा छलफल भएको बताइएको छ ।
प्रधानमन्त्री तथा मन्त्रिपरिषद्को कार्यालय सिंहदरबारमा भएको वार्तामा दुवै पक्षको सहमति हुन सक्ने सम्भावना भएका बुँदाबारे छलफल भए पनि निष्कर्ष भने ननिस्किएको बताइएको छ । डा. केसी ९ दिनदेखि धनगढीमा अनसनमा बसेका छन् ।
उनको स्वास्थ्य अवस्था जटिल बन्दै गएको सेती प्रादेशिक अस्पतालले जनाएको छ । उलाई कडा खालको अल्सरको लक्षण देखिएकोले विशिष्ट सेवा भएको अस्पतालमा लैजान सेतीले आग्रह गरेको थियो ।
त्यसपछि डा. केसीलाई लिन काठमाडौंबाट नेपाली सेनाको स्काइ ट्रक धनगढी पुगेपनि केसीले कुनै हालतमा काठमाडौं नआउने अडान राखेपछि रित्तै फर्किएको छ ।
