बागलुङ–जिल्लाका किसानले दुध बिक्री गरेर सहरको पैसा गाउँमा भित्र्याउन थालेका छन् । जिल्लाको काठेखोला र बागलुङ नगरपालिकाका किसानले दुध बिक्री गरेको एक वर्षमै ६ करोड ११ लाख ६८ हजार तीन सय १६ गाउँमा भित्रयाउन सफल भएका हुन् ।
उत्पादित दुध सहकारीमार्फत प्रशोधनसहित बजारीकरण गरी यहाँका कृषकहरूले मनग्य आम्दानी गर्दै आएका छन् । बागलुङ नगरपालिका र काठेखोला गाउँपालिकाका १४ वटा दुग्ध सहकारीमा आबद्ध किसानले आर्थिक वर्ष २०७८÷७९ मा सहकारीमार्फत दूधको संकलन, प्रशोधन र बजारीकरण गर्दा दीर्घकालीन रुपमा नै आम्दानी गर्न सफल भएका हुन् ।
दुध उत्पादन गर्न सके बजारीकरणको जिम्मा सहकारीले लिने भएकाले आफूजस्ता किसानलाई सहज भएको काठेखोला गाउँपालिका–५ का केशवप्रसाद कँडेलले बताए । उनी सृजना दुग्ध उत्पादक सहकारी संस्थाका सञ्चालकसमेत हुन् ।
काठेखोला गाउँपालिका–६ स्थित नमूना दुग्ध उत्पादक सहकारी संस्थाका शेयर सदस्यहरूले मात्रै दैनिक तीन सय दुध सहकारी संघलाई बजारमा पठाउने गरेको किसान बालानन्द कँडेलले जानकारी दिए ।
’दुध उत्पादन मात्रै गरेर भएन, बिक्रीका लागि बजार टाढा छ, १० लिटर दुध लिएर बजार आउने कुरा भएन सहकारीमार्फत दुध बिक्री गर्दा दुध धेरै टिकाउन सकिने, दुध प्रशोधनपछि बिक्री नभएमा अन्य दुग्धजन्य पदार्थ उत्पादन गर्न सकिने भएकाले हाम्रो दूधको बजार सुनिश्चित भयो’, उनले भने, ‘सहकारीले दूधको रकम सहकारीमार्फत भुक्तानी गर्दा सहकारीको कारोबारका आधारमा नाफासमेत आउँछ, किसानलाई दुध ढुवानी र घाँस ढुवानीमा अनुदान आउँछ । साथै पशुका लागि प्राविधिक सल्लाह र उपचारसमेत सहकारीमार्फत नै हुँदा सहज भएको छ ।’
चौध वटा सहकारीका शेयर सदस्य रहेका किसानले गाउँ–गाउँमा संकलन गरेको दुध एकमुष्ट बागलुङ दुग्ध उत्पादक सहकारी संघले संकलन, प्रशोधन तथा बजारीकरण गर्दै आएको छ । बागलुङ दुग्ध उत्पादक सहकारी संघले एक आर्थिक वर्षमा मात्रै १४ सहकारीका शेयर सदस्य किसानबाट छ करोड बढीको दुध खरिद गरेर बिक्री गरेको सहकारीका अध्यक्ष दीपक गौतमले बताए ।
चौध सहकारीमा आबद्ध करिब एक हजार चार सय किसानले एक वर्षमै छ करोडभन्दा बढी रकम आम्दानी गरेका हुन् । ‘किसानहरूले दुध उत्पादन गर्ने तर बजारको सुनिश्चितता नहुने मुख्य समस्या थियो, दूधलाई तापक्रम मिलाएर राख्नुपर्ने तथा दुध बिग्रेर खेर जाने समस्याका कारण किसानहरूले दुध उत्पादनका लागि ठूलो लगानी गर्न नसकेको अवस्था थियो’, अध्यक्ष गौतमले भने, ’किसान विचौलियाको मारमा समेत पर्नाले धराशयी बन्ने अवस्था अन्त्य गर्न सहकारीमार्फत दुध संकलन गरी सहकारीले नै घरघरमा दुध पु¥याउने कार्य गर्दै आएको छ, अहिले सहकारीले किसानबाट संकलन गरेको तीन हजार लिटर दुध दैनिक बिक्री भइरहेको छ, हामीले थोरै मुनाफा राखेर अरू रकम किसानलाई दिँदा किसानलाई दुग्ध व्यवसायप्रति उत्साह भएको छ ।’
गौतमका अनुसार थोरै दुध उत्पादन गर्ने किसानले बजार टाढा भएकाले समस्यामा पर्ने भए पनि थोरै–थोरै दुध सहकारीमा जम्मा गरेर सहकारीमार्फत एकमुष्ट बागलुङ बजारमा ल्याउँदा बजारीकरणमा सहज भएका कारण किसानहरू उत्साहित बनेका हुन्।
सहकारी २०५७ सालमा स्थापना गर्दा दुध संकलन गरी ल्याउने र बिक्री नभएर नालीमा फाल्ने सहकारी अहिले दूधको ब्रान्ड नै बनाउनाका साथै १९ कर्मचारीलाई प्रत्यक्ष रोजगारीसमेत दिँदै आएको छ। दूधलाई एकत्रित गर्ने ताजा दुध बिक्री गर्ने, बिक्री गरेर बचेको दूधको दूधजन्य पदार्थहरू जस्तै घीउ, नौनी, छुर्पी, लस्सी, पनिर र आइसक्रिम बनाएर बिक्री गर्ने काम गर्दै आएको सहकारी संघका प्रबन्धक वैकुण्ठप्रसाद शर्माले जानकारी दिए।
उनका अनुसार सहकारीले आर्थिक वर्ष २०७८÷७९ मा मात्रै किसानलाई छ करोड ११ लाख दुध खरिद बापतको रकम भुक्तानी दिएको र सहकारी संघले समेत रु ७४ लाख खुद बचत गर्न सफल भएको छ। बचत भएको रकमबाट किसानको पशु बीमा गर्ने, दुध तथा घाँस ढुवानी गर्ने तथा पशु प्रवद्र्धनात्मक काममा लगानी गर्ने सहकारी संघले जनाएको छ।
बागलुङ दुग्ध उत्पादक सहकारी संघमा झन्डै एक हजार पाँच सय किसानले धेरै थोरै दुध बजारीकरणका लागि पठाउछन्। संघले दूधसहित नौ प्रकारका दुग्धजन्य परिकार बिक्री तथा वितरणसमेत गर्दै आएको छ। तीमध्ये काठमाडौँमा छुर्पी निर्यात हुँदै आएका दुग्ध सहकारीका प्रबन्धक बैकुण्ठप्रसाद शर्माले जानकारी दिए। आर्थिक वर्ष २०७८÷७९ मा मात्रै पाँच लाख बराबरको छुर्पी काठमाडौं निर्यात गरिएको छ। सहकारीले एक वर्षमा ८५ लाखको दही, आठ लाख ७८ हजारको घीउ, सात लाख १८ हजारको पनिरसमेत बिक्री गरेको छ। बागलुङलाई गुणस्तरीय छुर्पी उत्पादन हुने जिल्लाका रुपमा परिचय दिने गरी सहकारीले छुर्पी उत्पादनमा बढी जोड दिन थालेको छ।
अहिले छुर्पीलाई सहकारी संघले प्रतिकेजी एक हजार दुई सयमा बिक्री गर्दै आएको छ। सहकारीमा आबद्ध किसानहरूले सहकारीमा आबद्ध भएर दूधको बजारीकरण गर्दा दूधको मूल्यमा समानता र बजारको सुनिश्चिता भएको बताए। सहकारीको उपयुक्त मोडेलका रुपमा दुग्ध सहकारी विकास भएको र बागलुङ दुग्ध उत्पादक सहकारी संघ देशकै नमूना दुग्ध उत्पादक सहकारी संघका रुपमा स्थापित रहेको राष्ट्रिय सहकारी महासंघका सञ्चालक हुमाकुमारी जिसीले बताए । कृषक सदस्यले उत्पादन गर्ने, सहकारी संस्थाले संकलन गर्ने र सहकारी संघले दुध तथा प्रशोधन गरी दुग्धजन्य पदार्थ बिक्री वितरण गरेर सहकारीको असल अभ्यास गरेको उनको भनाइ थियो ।
प्रकाशित मिति: बिहीबार, मंसिर ८, २०७९ १३:३१
प्रतिक्रिया दिनुहोस्
