काठमाडौँ । दशैँ बिदाको सात दिनको अवधिमा सर्वोच्च अदालतमा एउटा मात्रै बन्दी प्रत्यक्षीकरणको रिट निवेदन दर्ता भएर टुङ्गिएको छ । घटस्थापनादेखि नियमित कामकाज बन्द गर्ने सर्वोच्च अदालतले बन्दी प्रत्यक्षीकरणको निवेदन मात्रै सुनुवाइ गर्थ्यो । अघिल्ला वर्षहरूमा दैनिकजस्तो निवेदन दर्ता हुने गरेकोमा यस पटक भने एउटा मात्रै निवेदन दर्ता भएर पर्सीपल्ट खारेज भएको हो । कोही व्यक्ति गैर कानुनी थुनामा परेमा उनलाई थुनामुक्त गर्न आदेशको माग राखी दिइने निवेदनलाई बन्दी प्रत्यक्षीकरण निवेदन भनिन्छ । दशैँ बिदाको भोलिपल्ट जिल्ला प्रहरी परिसर टेकुमा थुनामा रहेका योगेन्द्र तामाङकी श्रीमती सुनाम तामाङले सर्वोच्च अदालतमा निवेदन दर्ता गराएकी थिइन् । उनको निवेदन दुई दिनपछि खारेज भएको हो । बिदा सुरु भएयता तामाङकै मुद्दा सुनुवाइका लागि सर्वोच्च अदालतमा दुई पटक एकल इजलास बसेको थियो । त्यसयता कुनै निवेदन दर्ता भएको छैन भने इजलास समेत बसेको छैन । लगातार तीन दिनभन्दा बढी समय सर्वोच्च अदालत बन्द भएमा बन्दी प्रत्यक्षीकरणको निवेदन सुनुवाइका लागि संयन्त्र खडा गर्नुपर्ने नियम छ । हरेक वर्ष सर्वोच्च अदालतले दसैँ बिदाका लागि बन्दी प्रत्यक्षीकरण निवेदन सुनुवाइका लागि आंशिक रूपमा प्रशासन खुला राख्छ भने हरेक दिन एकजना न्यायाधीशलाई पालो तोकेको हुन्छ । सर्वोच्च अदालत कोजाग्रत पूर्णिमाको भोलिपल्ट मात्रै नियमित रूपमा खुल्नेछ । आगामी २४ गते अदालत खुल्ने दिन कामु प्रधानन्यायाधीश हरिकृष्ण कार्कीले न्यायपालिकाको नेतृत्व सम्हाल्नेछन् । ६५ वर्षे उमेरहदका कारण कामु प्रधानन्यायाधीश रहेका वरिष्ठतम न्यायाधीश दीपककुमार कार्कीले दशैंविदाको विचमा अवकाश पाएका छन् ।